सबैभन्दा ठूलो चम्किलो शार्क फेलापर्यो
अनुसन्धानकर्ताहरूले जमिन र पानीमा बस्ने सबै प्राणीहरूमध्ये सबैभन्दा ठूलो चम्किलो जीवको पहिचान गरेका छन् ।
न्युजिल्यान्ड नजिकैको समुद्रमा महिनौँको अन्वेषणात्मक अभियानको नेतृत्व गरेका वैज्ञानिकहरूले नीलो-हरियो प्रकाश छोड्ने अन्दाजी ६ फिट लामोसम्म वृद्धि हुन सक्ने ठानिएको 'काइटफिन' नामक शार्क भेटिएको फ्रन्टिअर्स इन मरिन साइन्समा गत हप्ता प्रकाशित एक अध्ययनमा उल्लेख गरिएको छ ।
बेल्जियमको क्याथोलिक युनिभर्सिटी अफ लुवैनमा चम्किलो शरीर भएका जीवात्माका अध्येता जेरोमी मलिफिट नाम गरेका वैज्ञानिकले नेतृत्व गरेको अन्वेषण टोलीले जालमा पारिएका जीवित शार्कलाई अँध्यारो, चिसो कोठामा राखिएको पानीको ट्याङ्कीमा स्थानान्तरण गरी चम्किलो शार्कलगायत अन्य प्रजातिका जीवहरूको फोटो खिचेका थिए ।
जीवित चम्किलो शार्कको तस्वीर लिइसकेपछि समातिएका तीनैवटा शार्कका प्रजातिहरूलाई चम्किलो प्रकाश निकाल्ने अंगको अध्ययन गर्नका लागि छालाको नमुना निकाली तिनीहरूलाई मानवीय मृत्यु दिइएको जनाइएको छ ।
अन्वेषण टोलीका अनुसार मेलाटोनिन भन्ने हर्मोनका कारण जीवका शरीरमा त्यस प्रकारको चमक उत्पन्न हुने र अन्य हर्मोनहरूले त्यसलाई निभाइदिने प्रारम्भिक अनुसन्धानबाट देखिएको भए तापनि अझ अरू परीक्षण नभएका हर्मोनहरूको पनि त्यसमा योगदान हुन सक्ने बताइएको छ ।
हालसम्म पत्ता लागेको सबैभन्दा ठूलो चम्किलो शार्कको फोटो खिच्न सफल भएका डाक्टर मलेफिटले समुद्रका अन्य धेरै रहस्य उजागर गर्ने आशा गरेका छन् ।