साताको अन्तिम कारोबार दिन नेपाल स्टक एक्सचेञ्जमा कारोबार हुने सबै समूहका सबइन्डेक्सहरू बढेका छन् । शेयर कारोबार मापक नेप्से परिसूचक ९०.६७ अंकले उकालो लागेर २ हजार ५०६.६८ अंकमा पुगेको छ ।
‘क’ वर्गका कम्पनीहरूको कारोबार मापन गर्ने सेन्सेटिभ इन्डेक्स पनि १४.६७ अंकले उकालो लागेको छ । यसअघि बुधबारको कारोबारमा नेप्से परिसूचक ३९ अंकभन्दा धेरैले गिरावट आएको थियो ।
नेप्से परिसूचक बढे पनि कारोबार रकम भने ६ अर्ब रुपैयाँमा सीमित भएको छ । बुधबारको तुलनामा २५ करोड रुपैयाँभन्दा धेरैले शेयर कारोबार रकम घटेको छ । दिनभर भएका ६५ हजार १७४ कारोबारबाट २०६ कम्पनीका १ करोड ६६ लाख २२ हजार ७६३ कित्ता शेयर किनबेच भएका छन् ।
कारोबार रकम भने ६ अर्ब ५ करोड ८१ लाख ४ हजार ३१७ रुपैयाँ पुगेको छ ।
अन्य समूहमा रहेका कम्पनीहरुको सबइन्डेक्स ५.४४ प्रतिशतले, लगानी समूह ५.२६ प्रतिशतले र लघुवित्त समूहको सबइन्डेक्स ५.०६ प्रतिशतले उकालो लागेको छ ।
जलविद्युत समूह ४.७८ प्रतिशतले उकालो लाग्दा जीवन बीमा ३.५, बैंकिङ २.९६, होटल तथा पर्यटन २.९९, विकास बैंक २.४७ र फाइनान्स २.७८ प्रतिशतले बढेको छ ।
धेरै कमाउनेमा बिहीबार पनि चन्द्रगिरि हिल्स कम्पनीकै लगानीकर्ताहरू देखिएका छन् । केही दिनयता यस कम्पनीको शेयर मूल्य लगातार बढिरहेको छ । बिहीबार १० प्रतिशत अर्थात ५५ रुपैयाँले बढेर चन्द्रागिरिको शेयर मूल्य ६०५ रुपैयाँ पुगेको छ ।
दोस्रोमा लिबर्टी इनर्जी र तेस्रोमा सूर्योदय लघुवित्त वित्तीय संस्थाको शेयर मूल्य पनि १० प्रतिशतले नै बढेको नेप्सेले जनाएको छ ।
बिहीबार धेरै घट्ने सूचीको शीर्ष स्थानमा म्युचुअल फण्ड तथा डिबेञ्चर देखिएका छन् । पहिलो नम्बरमा देखिएको एनएमबी- ५० को मूल्य ३.४५ प्रतिशतले घटेर १२ रुपैयाँ ३१ पैसामा झरेको छ ।
दोस्रोमा आईसीएफसी फाइनान्स डिबेञ्चरको मूल्य १.७६ प्रतिशतले घटेर १ हजार १७१ रुपैयाँमा झरेको छ भने तेस्रोमा ग्लोबल आईएमई समुन्नत- १ को मूल्य १.४८ प्रतिशतले घटेर १४ रुपैयाँ ६६ पैसामा झरेको छ ।
