नेपाली सेनाको ‘अपरेसन महाहन्ट ७’ अन्तर्गत कोसी टप्पु वन्यजन्तु आरक्षबाट एक जनालाई हतियार र जंगली जनावरको आलो मासुसहित पक्राउ गरिएको छ । 

आरक्षणको रेन्ज पोस्ट भगवानपुरबाट खटिएको नेपाली सेना र आरक्षका कर्मचारीसहितको संयुक्त पेट्रोल टोलीले उदयपुरको अएलका नगरपालिका- २ भागलपुर बस्ने सुक्रमान राईलाई पक्राउ गरेको हो ।

सोही नगरपालिका मोरीयाधार इलाकाबाट उनलाई विभिन्न हतियारसहित पक्राउ गरेर कारवाहीका लागि कोसी टप्पु वन्यजन्तु आरक्ष कार्यालय, पश्चिम कुशाहामा बुझाइएको छ ।

उनको साथबाट भरुवा बन्दुक, सिसाको गोली, बारुद, जंगली जनावर लगुनाको मासुलगायत बरामद भएको बताइएको छ ।