नेपाली कांग्रेसका वरिष्ठ नेता रामचन्द्र पौडेलले सरकार बनाउन प्रचण्ड-माधव समूहलाई सहयोग गर्न सकिने बताएका छन् ।
चितवनमा आयोजित पत्रकार सम्मेलनमा कांग्रेसले अरूलाई सहयोग गरेर पनि देशलाई संकटबाट पार लगाउन सक्ने उनको भनाइ थियो ।
कांग्रेसले आफ्नो हैसियतमा रहेर अरूलाई सरकार बनाउन सहयोग गर्न सक्ने, त्यसमा कांग्रेसको भूमिका अझ महत्त्वपूर्ण हुने उनको दाबी छ । ओलीलाई सरकार चलाउन सहयोग गर्न कांग्रेसलाई नैतिकताले नदपने, ओलीबाहेक प्रचण्ड-माधव समूहलाई सहयोग गर्न सकिने र यसबारे सकारात्मक हुन छलफल गरिने पौडेलले बताए ।
पौडेलले पार्टी सभापति देउवालाई प्रधानमन्त्री बन्न सजिलो नभएको भन्दै देउवालाई प्रधानमन्त्री हुनबाट रोक्न खोजेको नभई लोकतन्त्र र प्रणालीलाई के गर्दा राम्रो हुन्छ, छलफल गरेर निस्कर्ष निकाल्नुपर्ने धारणा राखे ।
आफू राष्ट्रपति बनेर थान्को लाग्न नचाहेको पनि उनले बताए ।
राष्ट्रपति पाउने आश्वासनमा प्रचण्ड-माधव समूह नजिक नभएको र बाँचुन्जेल लोकतन्त्रका लागि लड्ने उनको भनाइ छ ।
नेता पौडेलले निर्वाचन आयोग आफ्नो कर्तव्यबाट पदच्युत भएको आरोप पनि लगाएका छन् ।
नेकपा विवाद सल्टाउने विषयमा आयोगले नेताहरूको मुख हेरेर बसेको भन्दै उनले संवैधानिक निकाय कसैको मुख हेरेर बस्न नहुने बताए ।