यौनजन्य आक्रमणबाट केटाकेटीलाई संरक्षण गर्ने भारत महाराष्ट्रको एउटा विशेेष अदालतले एक जना २९ वर्षीय शिक्षकलाई ११ र ९ वर्ष उमेरका २ जना किशोरीहरूलाई यौन दुर्व्यवहारको अभियोगमा ५ वर्षको जेल सजाय सुनाएको छ ।

अभियोजनलाई उदृत गर्दै चरुल शाहद्वारा लिखित हिन्दुस्तान टाइम्समा प्रकाशित समाचारअनुसार ती किशोरीहरूले आफूहरूलाई शिक्षकले अनुचित ढंगले छुने र चुम्बन गर्ने गरेकाले आफूहरू ती शिक्षकले पढाउने मदरसा र   सेमिनारी (पादरीको तालिम गर्ने कलेज)मा नजाने भनी आफ्ना अभिभावकलाई बताएपछि उक्त घटना  बाहिर आएको थियो । पीडित ११ वर्षीय किशोरीले आफ्नी आमालाई बताएअनुसार ती शिक्षकले उनलाई शौचालय जाने बहाना बनाएर राती सेमिनारीमा आउनूू भनेर बोलाउँथे ।

ती क्षिक्षकलाई सन् २०१६ अगस्ट महिनामा गिरफ्तार गरिएको भए पनि प्रहरीले ६० दिनभित्र अभियोगपत्र दर्ता गर्न नसकेकाले धरौटीमा छाडिएको थियो । मुद्दाको कारवाहीका क्रममा अभियुक्त शिक्षकविरुद्धको आरोप प्रमाणित गर्नका लागि अभियोजनले दुवै किशोरीहरु र तिनका अभिभावहरूलाई परीक्षण गरेको थियो ।

अदालतले ती किशोरीहरूको बयानका आधारमा ती शिक्षकलाई दोषी ठहर गरेको जनाइएको छ ।