प्रधानमन्त्री पुष्पकमल दाहाल 'प्रचण्ड'ले पर्सि मंगलबार संघीय शिक्षा ऐन संसद्‍मा पठाउने बताएका छन् ।

लामो समयदेखि रिक्त त्रिवि सेवा आयोगको अध्यक्ष पनि मंगलबारसम्म नियुक्त हुने उनले बताए ।

प्रधानमन्त्री प्रचण्डले उच्चस्तरीय शिक्षा आयोगको प्रतिवेदन खोजी भइरहेको बताए । तत्कालीन नेकपा नेतृत्वको सरकारका बेला तयार भएको र पार्टीको बहुमत सदस्य यसलाई सार्वजनिक र कार्यान्वयन गर्न तयार भए पनि तत्कालीन प्रधानमन्त्री केपी शर्मा ओली तयार नभएको उनले बताए ।

ओलीले त्यसलाई तकियामुनि राखेको प्रचण्डको आरोप थियो । 'अहिले त्यो हराएको छ’, उनले भने ।

समाजवादी विद्यार्थी मोर्चाले आइतबार काठमाडौंमा गरेको कार्यक्रममा उनले मंगलबार मन्त्रिपरिषद्‍बाट पास गरेर यो ऐन संसद्‍मा पठाउने बताए । उनले यसले शिक्षा क्षेत्रमा देखिएका थुप्रै कुरा सम्बोधन गर्ने तागत राख्ने बताए ।