सञ्चार तथा सूचना प्रविधिमन्त्री रेखा शर्माले यस वर्ष विद्यालयको पठनपाठन सुरु हुनुभन्दा पहिले नै हातहातमा पुस्तक पुगेको दाबी गरेकी छन् । उनले यो ऐतिहासिक काम भएको पनि बताएकी छन् । विगतमा परीक्षा हुँदासम्म पनि पुस्तक नपुगेको तर यसपालि समयमै पाठ्यपुस्तक पुग्नु सरकारको ठूलो उपलब्धि भएको उनकाे दाबी छ । 

अयोग्य लडाकुलाई आर्थिक सहयोग दिने निर्णय पनि पहिलाकै भएको उनकाे भनाइ छ । शुक्रबार दाङमा भएको एउटा कार्यक्रममा मन्त्री शर्माले पहिला गरिएको निर्णयलाई अहिले कार्यान्वयनमा ल्याउन लागेको सुनाइन् ।

फरक प्रसङ्गमा मन्त्री शर्माले दाङमा विमानस्थलका नाममा राजनीति नगर्न आग्रह गरिन् । 'यसो गर्दा विमानस्थल विस्तारमा असर गर्छ', उनले भनिन्, 'पहिलो प्राथमिकता भनेको तुलसीपुरमा रहेको टरिगाउँ विमानस्थललाई नै प्रभावकारी बनाउने हो । त्यहाँ प्राविधिक समस्या भए मात्र दाङको जुनसुकै ठाउँमा भए पनि प्रभावकारी विमानस्थल हुनुपर्छ ।'

सो अवसरमा ४ वटै पालिकाका माओवादी केन्द्रका अध्यक्षले विकास निर्माणको अवस्थाका बारेमा मन्त्री शर्मालाई जानकारी गराए । बबई गाउँपालिकाका अध्यक्ष एकलाल घर्ती, दङ्गीशरणका अध्यक्ष मनिराम चौधरी, तुलसीपुरका अध्यक्ष खुसीराम चौधरीलगायतले आ-आफ्नो धारणा राखेका थिए ।