सरकारले कक्षा- १२ पछिको डिप्लोमा, एड्भान्स डिप्लोमा (स्नातक गर्नुभन्दा अघि, ब्रिज कोर्ष) गर्न जानेलाई एनओसी नदिने निर्णय फिर्ता लिएको छ ।
वैदेशिक अध्ययन स्वीकृतिसम्बन्धी निर्देशिका, २०७९ सार्वजनिक गर्दै कक्षा- १२ पछिका डिप्लोमा, एड्भान्स डिप्लोमा (स्नातक गर्नुभन्दा अघि, ब्रिजकोर्ष) गर्न जाने विद्यार्थीलाई एनओसी नदिने फिर्ता लिएको हो ।
गत १९ चैतदेखि नेपालको संविधान र शिक्षा ऐनको संशोधनले विद्यालय शिक्षा भनेर कक्षा- १२ सम्मलाई परिभाषित गरेको र त्यही आधारमा निर्देशिका तयार गरेको भन्दै स्नातकअघिको कुनै पनि कार्यक्रमका लागि एनओसी दिन रोकेको थियो । उक्त निर्णयको चौतर्फी विरोध तथा दबाब भएपछि सरकारले निर्देशिका संशोधन गरी कक्षा- १२ पछि र स्नातकअघिका शैक्षिक कार्यक्रमका लागि पनि एनओसी दिने निर्णय गरेको छ ।
विदेशी विश्वविद्यालयका कपितय प्राविधिक नियमहरूका कारण संशोधन गर्नुपर्ने भएकाले संविधान र शिक्षा ऐनको संशोधनअनुसार निर्देशिका बनाइएको तर कतिपय विश्वविद्यालयले सोझै स्नातक भर्ना नदिने भएपछि निर्देशिका पनि संशोधन गर्नुपर्ने अवस्था आएको स्रोत बताउँछ ।
वैदेशिक अध्ययन स्वीकृतिसम्बन्धी निर्देशिका, २०७९ को दफा २८ मा ‘कक्षा- १२ वा सो सरह उत्तीर्ण गरी विदेशी शिक्षण संस्थामा उच्चशिक्षा अध्ययनको लागि जान चाहने विद्यार्थीलाई यस निर्देशिकाको व्यवस्था र प्रक्रिया पूरा गरी निर्देशिका जारी हुनुअघि स्वीकृति प्रदान गरिएका कार्यक्रमको लागि स्वीकृति प्रदान गर्न बाधा पर्नेछैन’ उल्लेख छ ।
निर्देशिका संशोधनसँगै विद्यार्थीहरूले डिप्लोमा तह वा सो सरहको अध्ययन तथा भाषा अध्ययनका लागि वैदेशिक अध्ययन अनुमतिपत्र (एनओसी) लिन पाउने भएका छन् ।
