हालसम्म मत गणना सम्पन्न भएका पालिकाहरूमा १४ हजार ४०७ जना महिला उम्मेदवार विजयी भएका छन् ।
आयोगका अनुसार कुल विजयी उम्मेदवारमध्ये महिलाको संख्या ४१ दशमलब २१ प्रतिशत छ । हालसम्म देशभर पालिकाको प्रमुख/अध्यक्ष, उपप्रमुख/उपाध्यक्ष, वडाध्यक्ष, महिला सदस्य, दलित महिला सदस्य र सदस्य पदमा ३४ हजार ९५३ जना उम्मेदवार विजयी बनिसकेका छन् । अब २६८ जना जनप्रतिनिधि निर्वाचित हुन बाँकी छ ।
आयोगले गत ३० वैशाखमा देशका सबै ७५३ वटै स्थानीय तहमा एकसाथ निर्वाचन गरेको थियो । निर्वाचन ३५ हजार २२१ जनप्रतिनिधिका लागि भएको थियो । निर्वाचनमा देशभर १ लाख ४५ हजार ११ जनाले उम्मेदवारी दिएका थिए ।
आयोगका अनुसार नेपाली कांग्रेसबाट ५ हजार ५४८, नेकपा एमालेबाट ५ हजार २६, नेकपा (माओवादी केन्द्र)बाट २ हजार ७९, जनता समाजवादी पार्टी (जसपा), नेपालबाट ६४३, नेकपा (एकीकृत समाजवादी)बाट ४०६, लोकतान्त्रिक समाजवादी पार्टी (लोसपा), नेपालबाट २५०, राष्ट्रिय प्रजातन्त्र पार्टीबाट ११६ र राष्ट्रिय जनमोर्चाबाट ६४ जना महिला उम्मेदवार विजयी बनेका छन् ।
बाँकी विजयी हुने महिलाहरू अन्य दल र स्वतन्त्र रूपमा उम्मेदवारी दिनेहरू छन् ।
प्रदेश १ बाट २ हजार ४५५, मधेस प्रदेशबाट २ हजार ७७०, बाग्मती प्रदेशबाट २ हजार ३४७, गण्डकी प्रदेशबाट १ हजार ६२२, लुम्बिनी प्रदेशबाट २ हजार १२४, कर्णाली प्रदेशबाट १ हजार ५२४ र सुदूरपश्चिम प्रदेशबाट १ हजार ५६० जना महिला उम्मेदवार विजयी बनेका छन् ।
