नेकपा एमालेको जारी विधान महाधिवेशनमा सहभागी अधिकांश प्रतिनिधिले पार्टीमा 'एक व्यक्ति, एक पद'को अवधारणा लागू गर्नुपर्ने सुझाव दिएका छन् ।
पार्टी नेतृत्वबाट पेस भएका राजनीतिक, सांगठनिक र विधान मस्यौदा प्रस्तावमा यस विषयमा स्पष्ट व्यवस्था नभएको भन्दै सहभागीले एक व्यक्ति, एक पदको अवधारणामा जोड दिएका हुन् ।
विगतमा माधव नेपाल खेमाले जोडदार रूपमा उठाउँदै आएको यो विषयलाई महाधिवेशन हलले समेत उठाएको छ । १० वटा समूहमा भएको छलफलका अधिकांश समूहबाट एक व्यक्ति, एक पदको विषय उठाइएको जनवर्गीय संगठनको तर्फबाट टोली नेता बनेकी अनेरास्ववियुकी अध्यक्ष सुनिता बरालले जानकारी दिइन् ।
उनका अनुसार राजकीय जिम्मेवारीबाहेकका पदमा एक व्यक्ति, एक पद कायम गर्न सके कार्यकर्ता र नेता पंक्तिमा देखिने नैराश्य समाप्त हुने सुझाव दिइएको छ ।
शनिबार ५ र आज (आइतबार) ५ वटा समूहले समूहगत छलफलपछि रिपोर्टिङ पेस गरिसकेका छन् । अब समूहले उठाएका प्रश्नमा अध्यक्ष केपी ओली, महासचिव ईश्वर पोखरेल र उपमहासचिव विष्णु पौडेलले जबाफ दिएपछि महाधिवेशन घोषणापत्र जारी गर्दै सम्मेलन सकिनेछ ।
समूहगत छलफलमा प्रतिनिधिहरूले संसद विघटनको विषयमा प्रश्न उठाए पनि समूहगत छलफलको निष्कर्ष सुनाउने बेलामा सबै टोली नेता यस विषयमा मौन बसेका छन् । पोलिटव्युरो हटाउने, उपमहासचिवको पद नराख्नेजस्ता प्रस्तावित विधानको व्यवस्थामा समेत सहभागीहरूले असन्तुष्टि जनाएका छन् ।
वरिष्ठ नेता नराख्ने प्रस्तावमा खास वास्ता नगरेका प्रतिनिधिले उपाध्यक्षको संख्या घटाउन नहुने, ३ जना उपमहासचिव राख्नुपर्ने, सचिवको संख्या घटाउन सकिने, ७० वर्षे उमेर हदको व्यवस्थालाई थप व्याख्या गर्नुपर्ने, पार्टीको नीति र सिद्धान्तमा प्रष्ट व्याख्या गर्नुपर्नेजस्ता विषय उठाएका छन् ।
तत्कालीन नेकपा (माओवादी केन्द्र)बाट समाहित भएर आएका टोली नेताहरूले भने एमालेलाई तत्कालीन नेकपाको निरन्तरताको रूपमा व्याख्या गर्नुपर्ने प्रस्ताव अघि सारेका छन् ।
केन्द्रीय सदस्य प्रभु शाहको एउटा टोली यही विषयमा विमति राख्दै महाधिवेशनमा सहभागी नभइरहेका बेला महाधिवेशन हलले समेत यस विषयलाई चासोका साथ हेरेको सहभागीहरूले बताएका छन् । समूहगत छलफल सकिएलगत्तै अध्यक्ष ओली महाधिवेशनस्थल पुगेका छन् । यतिबेला खाना खाने र नाचगानको क्रम चलिरहेको छ ।
