नेपाल कम्युनिस्ट पार्टी (एमाले)का अध्यक्ष केपी शर्मा ओलीले आफू र अहिलेको सरकारले ल्याएको राजनीतिक दलसम्बन्धी अध्यादेशमा धेरै भिन्नता भएको दाबी गरेका छन् ।

पूर्वप्रधानमन्त्रीसमेत रहेका ओलीले आफू र शेरबहादुर देउवा नेतृत्वको सरकारले ल्याएको अध्यादेशको उद्देश्य, मनसाय, विधि, प्रक्रिया र नियतमा फरक भएको बताएका हुन् । पार्टीले आज आयोजना गरेको पत्रकार सम्मेलनमा बोल्दै ओलीले आफूले अध्यादेश ल्याउँदा कुनै पार्टी विशेषलाई फुटाउन नल्याएको तर अहिले एमाले फुटाउनकै लागि अध्यादेश ल्याइएको जिकिर गरे ।

अध्यादेश जारी गर्नु आफैँमा असंवैधानिक नभएको तर संसद अधिवेशन नचलेका बेला, अन्त्य भएका बेला वा संसद विघटन भएको अवस्थामा अध्यादेश आउन सक्ने तर त्यो देश र जनताका लागि हुनुपर्ने ओलीको भनाइ थियो ।

माधव नेपालसँग सोधेर नै २० प्रतिशतको प्रावधान राखिएको भन्दै ओलीले ;बरु माधव नेपालसँग जति जना सांसद संख्या पुग्छ, त्यति भए पुग्ने भनेर लेखेको भए हुन्थ्यो, त्यसमा उहाँहरू अल्मलिनुभएछ' भन्दै व्यंग्य गरे ।