सानिमा लाइफ इन्स्योरेन्स लिमिटेडको आईपीओ बाँडाफाँट भएको छ । शनिबार कम्पनीको शेयर निश्कासन तथा बिक्री प्रबन्धक प्रभु क्यापिटलले आईपीओ बाँडफाँट गरेको हो ।

सानिमा लाइफ इन्स्योरेन्सको प्राथमिक शेयरका लागि प्राप्त २४ लाख १९ हजार ८४८ वटा आवेदनमध्ये दोहोरो आवेदनका कारण रद्द भएका ५ हजार ४३४ तथा अन्य कारणबाट आवेदन रद्द भएका १ लाख ६ हजार २९२ बाहेक बाँकी रहेका योग्य आवेदनहरू २३ लाख ०८ हजार १२२ वटामध्येबाट ५ लाख ४० हजार जनालाई न्यूनतम १० इकाई बाँडफाँट गरिएको छ ।

गत २० साउनदेखि २४ साउनसम्म सार्वजनिक निश्कासन खुला गरिएको सानिमा लाइफ इन्स्योरेन्स लिमिटेडको प्राथमिक शेयरमा कूल शेयर ६० लाख कित्तामध्ये सामूहिक लगानी कोषलाई ५ प्रतिशत बराबर ३ लाख कित्ता तथा कर्मचारीलाई ५ प्रतिशत बराबर ३ लाख कित्ता छुट्याई बाँकी ५४ लाख कित्ता शेयर सर्वसाधारणका लागि निश्कासन गरिएको थियो । निश्कासनको करिब ४.४८ गुणासम्म आवेदन परेपछि धितोपत्र निश्कासन तथा बाँडफाँट निर्देशिका, २०७४ को निर्देशन ३० को ४ अनुसार बाँडफाँट गरिएको बताइएको छ ।

शेयर बाँडफाँटको नतिजा प्रभु क्यापिटलको वेबसाइट तथा सीडीएससीको वेबसाइट https://iporesult.cdsc.com.np बाट हेर्न सकिनेछ ।