नेपाल कम्युनिस्ट पार्टी (एमाले)ले प्रधानमन्त्री शेरबहादुर देउवा नेतृत्वको सरकारलाई विश्वासको मत नदिने निर्णय गरेको छ । आज बसेको स्थायी कमिटी बैठकले संस्थापन र असन्तुष्ट खेमाका कार्यदलले गत २७ असारमा तयार पारेको १० बुँदे सहमति अनुमोदन गर्दै कार्यान्वयनमा लैजाने र कार्यदल भंग गर्ने निर्णय पनि गरेको छ ।

बैठकमा अध्यक्ष केपी शर्मा ओली खेमाका नेताहरू मात्र उपस्थित थिए । बैठक चलिरहेका बेला माधवकुमार नेपाल खेमाका कार्यदल सदस्यहरू पुगेर बैठक रोक्न र १० बुँदे सहमतिअनुसार अघि बढ्न आग्रह गरे पनि बैठकलाई माधव खेमाका सदस्यको अनुपस्थितिमै जारी राखिएको थियो ।

अध्यक्ष ओलीले बैठक जारी राख्ने र कार्यसूची अगाडि बढाउन भनेपछि नेपाल खेमाका नेताहरू बाहिरिएका थिए । संस्थापन खेमाका नेताहरू मात्र सहभागी स्थायी कमिटी बैठकले अलोकतान्त्रिक र अस्वस्थ विधिबाट देउवाको नेतृत्वमा सरकार गठन भएको भन्दै यस सरकारलाई समर्थन नगर्ने निर्णय गरेको एक स्थायी कमिटी सदस्यले बताए । आफ्ना पार्टीका प्रतिनिधिसभा सदस्यहरूलाई वर्तमान सरकारलाई विश्वासको मत नदिन र स्थायी कमिटी बैठकको निर्णय पालना गर्न निर्देशन दिने निर्णय पनि बैठकले गरेको छ ।