'माधव नेपाल जस्ता गद्दारलाई क्षमा गर्न सकिन्नँ': केपी औली
नेपाल कम्युनिस्ट पार्टी (एमाले)का अध्यक्ष केपी शर्मा ओलीले वरिष्ठ नेता माधवकुमार नेपाललाई आफ्नै पार्टीको सरकार ढाल्न अगुवाइ गरेको आरोप लगाएका छन् । उनले नेपाललाई कुनै हालतमा क्षमा दिन नसकिने पनि बताएका छन् ।
प्रधानमन्त्रीको सरकारी निवास बालुवाटार छाडेर आज बालकोटस्थित निजी निवास फर्किएका अध्यक्ष ओलीले आफ्नै पार्टीको सरकार ढाल्ने माधव नेपाललाई गद्दार पनि भनेका छन् ।
अध्यक्ष ओलीले माधव नेपालका पछाडि लाग्नेहरूका सवालमा कमीकमजोरी महसुस गरेर पार्टीमा फर्किए काम गर्ने मौका दिने बताए पनि नेपाललाई भने कुनै अवस्थामा क्षमा गर्न नसकिने प्रस्ट पारे ।
'माधव नेपालको हकमा आत्मालोचना स्वीकार्ने कुनै ठाउँ छैन । यो परिस्थितिको निर्माणकर्ता नेपाल हो र अगुवाइ पनि उहाँले नै गर्नुभएको हो । माधव नेपाल जस्ता गद्दारहरूलाई कुनै क्षमा गर्न सकिन्नँ’, ओलीले भने ।
पार्टीभित्र विभिन्न शक्ति केन्द्रको घुसपैठ भएको, पार्टीभित्रका कमजोर तत्त्वहरू बिकाउमा लागेका, प्रतिक्रियावादीका पछि लागेर पार्टी र जनताको शक्तिविरुद्ध आफ्नै सरकार ढाल्न कहिले राष्ट्रपति कहाँ विरोधीलाई अघि लगाएर गएका, कहिले अदालत पुगेका ओलीको आरोप थियो ।