विमतिहरूबाटै एउटा सहमति जन्माऊ,
आऊ निरासाभित्रै आशा अलिकति जन्माऊ,
युध्द, द्वन्द्व, हत्या, आतङ्क जारी छ वर्षौदेखि,
त्यागेर रिस, राग द्वेष सबै अब प्रगति जन्माऊ!!

उदास उदास फूलहरू छन् बगैँचाभरि,
घुम्दै छन् भमराहरू बगैँचा वरिपरि,
आउँछ, जान्छ हरेक साल प्रेम दिवस,
हजारौँ कोपिलाहरूको सौन्दर्य हत्या गरी!!

माया गर वा घृणा गर, तिम्रै मर्जी
शंका गर वा आँखा तर, तिम्रै मर्जी
मैले त राखेकै छु मुटुभित्र, आँखाभित्र
नजिक आऊ वा टाढा सर, तिम्रै मर्जी!!

दूधको साक्षी बिरालो राखेपछि के होला?
चड्कन छेउमा दाहिने गालो राखेपछि के होला?
नरोए हुन्छ धेरै डाको छोडी, नपछुताए हुन्छ अब,
आफैँ हिँड्ने बाटोभरि जालो राखेपछि के होला?