आफूलाई अभियन्ता बताउने गरेका ज्ञानबहादुर शाही उर्फ ज्ञानेन्द्र शाहीले पत्रकारलाई अपशब्द प्रयोग गरेर धम्क्याएका छन् ।

जनता टेलिभिजनबाट प्रसारण हुने कार्यक्रम ‘वाइलाइन’मार्फत सुर्खेतमा शाहीले मदिरा सेवन गरी स्थायनीयसँग गरेको भनिएको दुर्व्यवहार र शाहीमाथि भएको कुटपिटको घटनाबारे प्रसारण भएको थियो ।

उक्त सामग्री प्रसारण गरेको भन्दै कार्यक्रम प्रस्तोता धीरज बस्नेत र सोही टेलिभिजनमा कार्यरत पत्रकार शिखा श्रेष्ठलाई अपशब्द प्रयोग गर्दै शाहीले गालीगलौज गरेको श्रेष्ठले जानकारी दिइन् । 

पत्रकारद्वय बस्नेत र श्रेष्ठलाई आफ्नो कर्तव्य निर्वाह गरिरहँदा धम्क्याएपछि पत्रकार महासंघले विज्ञप्ति जारी गर्दै  विरोध जनाएको छ ।

महासचिव रोशन पुरीले एक विज्ञप्ति जारी गर्दै पत्रकारको सुरक्षामा विशेष ध्यान दिन सम्बन्धित निकायसँग माग पनि गरेको छ ।