प्रधानमन्त्री केपी शर्मा ओलीले मन्त्रिपरिषद् पुनर्गठनको तयारी गरेका बालुवाटार निकट स्रोतले जनाएको छ ।
पछिल्लो समय जनता समाजवादी पार्टीभित्र देखिएको फुटको कारण ओली नै भएको चर्चा भइरहँदा ओलीले आफ्नो समर्थन गरिरहेका जसपाका महन्थ ठाकुर-राजेन्द्र महतो खेमाका केही नेतालाई मन्त्री बनाउन लागेका स्रोत बताउँछ ।
स्रोतका अनुसार ठाकुर-महतो खेमाका नेतालाई विगतमा माओवादी केन्द्रले लिएका मन्त्रालय दिने तयारी छ । संभवतः आजै साँझसम्ममा मन्त्रिपरिषद् पुनर्गठन गरिने ओली निकट स्रोतको भनाइ छ ।
यी नेता ओली सरकारमा सहभागी हुने जसपा निकट स्रोतले जानकारी दिएको छ ।
वरिष्ठ नेता राजेन्द्र महतो उपप्रधान तथा शहरी विकासमन्त्री बन्नेछन् भने शरदसिंह भण्डारीले ऊर्जा, जलस्रोत तथा सिँचाइ मन्त्रालयको जिम्मेवारी पाएका छन् । अनिल झाले खानेपानी र लक्ष्मणलाल कर्णले भूमि व्यवस्था, सहकारी तथा गरिबी निवारण मन्त्रालय सम्हाल्दा विमल श्रीवास्तवलाई श्रम, रोजगार तथा सामाजिक सुरक्षा र उमाशंकर अरगरियालाई युवा तथा खेलकुद मन्त्रालय परेको छ ।
यस्तै चन्दा चौधरीलाई महिला, बालबालिका तथा जेष्ठ नागरिक र एकबाल मियालाई वन तथा वातावरण् मन्त्रालयको जिम्मेवारी दिइने बताइएको छ ।
जसपाले दुई राज्यमन्त्री पनि टुंगो लगाएको छ । चन्द्रकान्त चौधरी ऊर्जा र रेनुका गुरुङ महिला बालबालिका राज्यमन्त्री हुनेछन् ।