वरिष्ठताका आधारमा संवैधानिक इजलास पुनर्गठन हुने
प्रतिनिधिसभा विघटनविरुद्धका रिटको सुनुवाइका लागि गठित संवैधानिक इजलासका न्यायाधीशमाथि बहसकर्ता वकिलहरूले बारम्बार प्रश्न उठाइरहेपछि सुनुवाइ अवरुद्ध बनेको थियो ।
आज वरिष्ठताका आधारमा संवैधानिक इजलास गठन गर्न प्रधानन्यायाधीश चोलेन्द्रशम्शेर जबरा सहमत भएका छन् । यससँगै प्रतिनिधिसभा विघटनको मुद्दा हेरिरहेको संवैधानिक इजलास पुनगर्ठन हुने भएको छ ।
संवैधानिक इजलासमा रहेका न्यायाधीशद्धय तेजबहादुर केसी र बमकुमार श्रेष्ठमाथि कानुन व्यवसायीहरूले प्रश्न उठाएपछि प्रधानन्यायाधीश जबरा र सर्वोच्च बार एसोसिएसनका पदाधिकारीहरूबीच आज छलफल भएको थियो । त्यस क्रममा संवैधानिक इजलाससम्बन्धी नियममै परिर्वतन गरेर वरिष्ठताका आधारमा बेञ्च गठन गर्ने व्यवस्था गर्न प्रधानन्यायाधीश सहमत भएका हुन् ।
स्रोतका अनुसार एक साताभित्रै संशोधन प्रस्ताव ल्याउने र त्यसपछि मात्र संवैधानिक विवाद अगाडि बढाइनेछ ।
मंगलबार सर्वोच्च बारसँग भएको सहमतिपछि भने अब संवैधानिक इजलास गठनको विवाद सदाका लागि टुंगिने भएको छ । सहमतिअनुसार नियमावली संशोधन भयो र त्यसअनुसार बेञ्च गठन भयो भने संवैधानिक इजलासमा प्रधानन्यायाधीश जबरासँगै न्यायाधीशहरू दीपककुमार कार्की, मीरा खड्का, हरिकृष्ण कार्की र विश्वम्भर श्रेष्ठ रहनेछन् ।
न्यायाधीश कार्कीले यो पटक पनि संवैधानिक इजलासमा बस्दिनँ भनेमा वरीयता क्रममा छैटौँ नम्बरमा रहेका ईश्वरप्रसाद खतिवडाको पालो आउनेछ ।
