बाल सहभागितामा काम गर्ने संस्थाहरूको साझा समूह कन्सोर्टियम नेपालले कोभिड-१९ महामारीको समयमा बालबालिकाको सुरक्षालाई विशेष प्राथमिकतामा राख्न र स्थानीय तहको वार्षिक सहभागितात्मक योजना निर्माण प्रक्रियामा उपयुक्त वैकल्पिक माध्यममार्फत बालबालिकाहरूको विचार र सहभागिताको सुनिश्चितता गर्न सबै स्थानीय तहहरूलाई पत्र पठाउँदै अपिल गरेको छ ।
अहिले तीनै तहका सरकारले आगामी आर्थिक वर्षको नीति तथा कार्यक्रम र बजेटको तयारी गरिरहेका छन् । नीतिगत रूपमा नै स्थानीय तहको वार्षिक नीति तथा कार्यक्रम र बजेट निर्माणमा बालबालिकाहरू समेतको सहभागिता सुनिश्चित गरिएको छ । स्थानीय तहहरूले आफ्नो ७ तहको योजना निर्माण प्रक्रियाका क्रममा बाल भेलासमेत गर्नुपर्ने भन्दै यस पटक कोरोना महामारीमा बालबालिकाको विषयलाई अझै प्राथमिकतामा राख्न जरुरी रहेकामा कन्सोर्टियमले जोड दिएको छ ।
'कोभिड- १९ महामारीको दोस्रो लहरको वर्तमान अवस्थामा बालबालिकाहरू पनि प्रभावित भएका छन् । बालबालिहरूमा जोखिम बढ्दो छ । बालबालिकाहरूको पढाइ अवरुद्ध भएको छ । मनोरञ्जनात्मक र अतिरिक्त क्रियाकलापहरूमा सहभागिता कम भएका कारण बालबालिकाहरूमा मनोसामाजिक समस्या पनि देखिएको छ', कन्सोर्टियम नेपालको अपिल पत्रमा लेखिएको छ ।
बालबालिकाहरूमा हिंसाको जोखिम र बढ्दो अनलाइन माध्यमको प्रयोगमा अनलाइन सुरक्षाको सवालमा समेत विशेष ध्यान पुग्नुपर्ने कन्सोर्टियमको अपिलमा उल्लेख छ ।
महामारीको समयमा बालबालिकाहरूको सुरक्षाका लागि सबैको उचित ध्यान र लगानी पनि हुनुपर्छ भन्दै उनीहरूका लागिसमेत खोपको सुनिश्चितताका लागि आवश्यक पहल गर्न प्रदेश सरकार तथा संघ सरकारसँग कन्सोर्टियमले आग्रह गरेको छ ।
कोभिड- १९को दोस्रो लहर र निषेधाज्ञालाई मध्यनजर गर्दै वैकल्पिक माध्यम (भर्चुअल बालभेला, अनलाइन सुझाव संकलन, एमएमएस सुझाव, फोन सुझाव, बालक्लबहरूसँग सुझाव संकलन आदि)मार्फत बालबालिकाहरूको आवाज सुनिदिन कन्सोर्टियमको अपिल रहेको छ ।
