संसद विघटनविरुद्धका रिटको सुनुवाइ सुरु

प्रतिनिधनसभा विघटनविरुद्ध सर्वोच्च अदालतमा परेका रिटहरूको सुनुवाइ आजदेखि सुरु भएको छ  । ३० वटामध्ये प्रधानन्यायाधीश चोलेन्द्रशमशेर जबराको बेन्चमा परेका १९ वटा रिटमाथि सुनुवाइ सुरु भएको हो ।

पहिलो नम्बरमा वीरभद्र जोशीसहितले दायर गरेको रिट निवेदन छ । जोशीले बहस सुरु गरिसकेका छन् ।

अन्तरिम आदेश माग गरिएका १९ रिटहरूको सुनुवाइ प्रधाननन्यायाधीश जबराले आफ्नो एकल बेन्चमा हुने गरी तोकेका छन् । संवैधानिक इजलासमा सुनुवाइको माग गरिएका ११ वटा रिटको भने १४ जेठका लागि पेसी तोकिएको छ ।

गत ७ जेठको मध्यरातमा सरकारको सिफारिसमा राष्ट्रपति विद्यादेवी भण्डारीले धारा ७६(५) बमोजिमको प्रधानमन्त्री नियुक्ति हुने आधार नरहेको भन्दै प्रतिनिधिसभा विघटन गरी मध्यावधि निर्वाचन घोषणा गरेपछि त्यसविरुद्ध ३० वटा रिट दर्ता भएका छन् ।

प्रतिनिधिसभा विघटन असंवैधानिक भएको जिकिर गर्दै र धारा ७६(५) अनुसार शेरबहादुर देउवालाई प्रधानमन्त्री नियुक्त गर्नुपर्ने माग गर्दै विपक्षी गठबन्धनका १४६ जना सांसदले पनि सर्वोच्च अदालतमा रिट दर्ता गरेका छन् ।