पछिल्लो समय सत्ता समीकरणमा 'हिसाब-किताब' नमिलेका कारण जनता समाजवादी पार्टीमा विवाद बढ्दै जाँदा एक समूहले अर्को समूहलाई स्पष्टीकरण सोध्ने क्रम सुरु भएको छ ।
जसपाको उपेन्द्र यादव र डा. बाबुराम भट्टराई खेमाले ४ जना नेता महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई स्पष्टीकरण सोधेको छ ।
जसपा अध्यक्ष ठाकुरले पनि अर्का अध्यक्ष उपेन्द्र यादवलाई ७ बुँदे स्पष्टीकरण सोधेका थिए । यादव पक्षले भने ठाकुरलाई ९ बुँदे स्पष्टीकरण सोधेको छ ।
पछिल्लो समय विकसित घटनाक्रममा ठाकुर र महतो खेमा प्रधानमन्त्री केपी ओलीसँग नजिकिएको छ भने यादव र डा. बाबुराम भट्टराई खेमा विपक्षी गठबन्धनमा सहभागी भएको छ ।
दुवैले एकअर्कालाई स्पष्टीकरण सोधेपछि जसपा विभाजनतर्फ अग्रसर भएको अनुमान गरिएको छ । ठाकुरले यादवलाई पार्टी निर्णयविपरीत गतिविधि गर्दै हिँडेको भन्दै स्पष्टीकरण सोधेका छन् ।
यादव खेमाले भने ओलीको अलोकतान्त्रिक, असंवैधानिक र प्रतिगमनकारी कदमदाई पार्टी निर्णय र नीतिविपरीत साथ दिएको भन्दै ठाकुरलाई स्पष्टीकरण सोधेको छ ।
यादव खेमाले जसपाको संसदीय दलको नेता बनेका राजेन्द्र महतोलाई पनि ६ बुँदे स्पष्टीकरण सोधेको छ ।
महतोलाई सोधिएको स्पष्टीकरणमा ओलीको कदमलाई साथ दिएको, संसदीय दलको विधान बनी नसकेको अवस्थामा केका अधारमा संसदीय दलको नेता बनेको ? भनेर जबाफ मागिएको छ ।
विधानविपरीत पार्टीमा स्वेच्छाचारिता लाद्न खोजेको, गुटबन्दी गरेको, पार्टीको अनुशासन भंग गराउन खोजेको विषयमा कारबाही किन नगर्ने ? भनेर महतोलाई स्पष्टीकरण सोधिएको छ ।
त्यस्तै, यादव पक्षले जसपा नेता लक्ष्मणलाल कर्ण र सर्वेन्द्रनाथ शुक्ललाई ५ बुँदे स्पष्टीकरण सोधेको छ ।
यादव पक्षले कर्ण र शुक्ललाई स्पष्टीकरण सोध्दै ओलीको कदमलाई साथ दिएको, संसदीय दलको विधान बनी नसकेको अवस्थामा राजेन्द्र महतोलाई के आधारमा संसदीय दलको नेता स्वीकार गरेको ? भनी जबाफ मागेको छ ।
