नेकपा एमालेले आज साधारण सदस्यसमेतबाट निश्कासन गरेका नेता झलनाथ खनालले नयाँ पार्टी खोल्ने बताएका छन् । आफूहरूलाई पार्टीले गरेको कारबाहीको कुनै अर्थ नरहेको उनको भनाइ छ ।
प्रधानमन्त्री एवं एमाले अध्यक्ष केपी शर्मा ओली कम्युनिस्ट आन्दोलनका ‘गद्दार’ भएको आरोप लगाउँदै कम्युनिस्ट आन्दोलनका गद्दारले गर्ने कथित कारबाहीले केही फरक नपर्ने पनि खनालले बताए ।
खनालले नयाँ पार्टी गठन गर्ने विषयमा पर्याप्त छलफल गरेर अगाडि बढ्ने उनको भनाइ छ ।
नेकपा एमालेले बरिष्ठ नेता झलनाथ खनाल र माधवकुमार नेपाललगायत ११ जना सांसदलाई आजै पार्टीको साधारण सदस्यसमेत नरहने गरी निश्कासन गरेको थियो ।
एमाले स्थायी कमिटीको आज बसेको बैठकले खनाल र नेपालसहित विघटित संसदका ११ जना सांसदलाई निश्कासन गरेको हो ।
शनिबार स्पष्टीकरण मागिएका खनाल, नेपाल, भीम रावलसहित ११ जनालाई पार्टीको अनुशासन उल्लंघन गरेको र विपक्षी पार्टीका नेतालाई प्रधानमन्त्री बनाउन हस्ताक्षर गरेको अभियोगमा निश्कासन गरेको एक स्थायी कमिटी सदस्यले बताए ।
निश्कासनमा पर्नेमा समानुपातिकबाट सांसद बनेका रामकुमारी झाँक्री, मुकुन्द न्यौपाने, कलिला खातुन, सरला यादव, नीरादेवी जैरु, पुष्पा कर्ण कायस्थ र कल्याणी खड्कासमेत छन् ।