१४६ जना सांसदको हस्ताक्षरसहित रिट दर्ता, प्रतिनिधिसभा पुनर्स्थापना र देउवालाई प्रधानमन्त्री माग
गत ७ जेठ मध्यरातमा प्रधानमन्त्री र राष्ट्रपतिको मिलेमतोमा गरिएको प्रतिनिधिसभा विघटनविरुद्ध विपक्षी गठबन्धनले सर्वोच्च अदालतमा रिट दायर गरेको छ ।
विपक्षी गठबन्धनका १४६ जना सांसदहरूले संसद पुनर्स्थापना गर्न र नेपाली कांग्रेसका सभापति शेरबहादुर देउवालाई प्रधानमन्त्री नियुक्त गर्न माग गर्दै सोमबार सर्वोच्च अदालतमा रिट दायर गरेका हुन् ।
प्रधानमन्त्रीका लागि देउवासँगै एमाले संसदीय दलका नेता केपी शर्मा ओलीले पेस गरेको दाबीलाई अस्वीकार गरेकी राष्ट्रपति विद्यादेवी भण्डारीले शुक्रबार मध्यरातमा सरकारको सिफारिसमा प्रतिनिधिसभा विघटन गरेर २६ कात्तिक र ३ मंसिरमा मध्यावधि निर्वाचन घोषणा गरेकी थिइन् । राष्ट्रपतिको उकेत कदमलाई असंवैधानिक भन्दै विपक्षी गठबन्धनका १४६ जना सांसदले सोमबार रिट दायर गरेका हुन् ।
प्रष्ट बहुमतसहित प्रधानमन्त्रीमा दाबी गरेका देउवालाई राष्ट्रपतिले प्रधानमन्त्री नियुक्त नगर्नु असंवैधानिक भएको उनीहरूको ठहर छ । 'संसदमा बहुमत देखाउन सक्दिनँ' भनेर वैकल्पिक सरकार गठनका लागि राष्ट्रपतिलाई अनुरोध गरेका प्रधानमन्त्री ओलीलाई फेरि प्रधानमन्त्रीमा दाबी गर्न जाने हक नभएको विपक्षी सांसदहरूको जिकिर छ ।
रिटमा प्रतिनिधिसभा विघटन असंवैधानिक भएको भन्दै त्यसलाई खारेज गर्न पनि माग गरिएको छ । १४९ जना सांसदको हस्ताक्षरसहित देउवाले गरेको दाबी वैधानिक भएकाले देउवालाई प्रधानमन्त्रीमा नियुक्त गर्न परमादेश दिनुपर्ने रिट निवेदकहरूको माग छ ।
