परमादेशमार्फत देउवालाई प्रधानमन्त्री घोषणा गर्न माग गर्दै रिट!
राष्ट्रपति विद्यादेवी भण्डारी र प्रधानमन्त्री केपी शर्मा ओलीको पछिल्लो 'असंवैधानिक हर्कत'विरुद्ध विपक्षी गठबन्धन अदालत जाने भएको छ ।
आज विपक्षी गठबन्धनका नेताहरूले कांग्रेस सभापति शेरबहादुर देउवालाई सर्वोच्च अदालतबाटै प्रधानमन्त्री नियुक्तिका लागि परमादेश जारी हुनुपर्ने माग गर्दै सर्वोच्च अदालतमै बहुमत प्रस्तुत गरेर देउवालाई प्रधानमन्त्री बनाउने मागसहितको रिट विपक्षी गटबन्धनले तयार पारेका छन् ।
परमादेशमार्फत देउवालाई प्रधानमन्त्री घोषणा गर्न माग गरिएको रिटमा बहुमत सांसदहरूको हस्ताक्षर जुटाएर सर्वोच्च अदालतमै सांसदहरू सशरीर उपस्थित हुने भएका छन् ।
संविधानको धारा ७६(३) अनुसार नियुक्त, भएका प्रधानमन्त्री ओलीले बहुमत जुटाउन नसकेको भन्दै राष्ट्रपतिकहाँ सिफारिस गरेको र राष्ट्रपतिले धारा ७६(५) अन्तर्गतको सरकार गठनका लागि आह्वान गरिसकेको अवस्थामा केपी ओलीको वैधानिकता समाप्त भएको रिटमा जिकिर गरिएको छ ।
धारा ७६(५) मा जानका लागि सिफारिस गरिसकेपछि प्रधानमन्त्री ओलीको वैधता समाप्त भएको र राष्ट्रपतिले १४९ जना सांसदको बहुमत रहेका शेरबहादुर देउवालाई प्रधानमन्त्री नियुक्त गर्नै पर्ने संवैधानिक बाध्यता रहेको रिटमा उल्लेख छ ।
सर्वोच्च अदालतले देउवालाई प्रधानमन्त्री नियुक्त गर्न परमादेश जारी गरेपछि संसद विघटन गर्ने ओलीको कदम स्वतः अवैधानिक ठहरिने र संसद स्वतः पुनस्थार्पित हुने तर्क रिटमा छ ।
