प्रधानमन्त्री ओलीसमेतलाई आयोगले भन्यो- 'आचारसंहिता उल्लंघन नगर्नू, कारबाही हुन्छ'
राष्ट्रियसभाका रिक्त पदमा ६ जेठमा हुने निर्वाचनमा प्रधानमन्त्री केपी शर्मा ओलीसमेतले निर्वाचन आचारसंहिताविपरीत मौन अवधिमा रामबहादुर थापा बादलका पक्षमा मत मागेको प्रति लक्षित गर्दै त्यसप्रति आयोगको ध्यानाकर्षण भएको जनाएको छ ।
निर्वाचन आयोगले आचारसंहिताविपरीत केही व्यक्तिले विज्ञप्तिमार्फत मत मागेकामा ध्यानाकर्षण भएको जनाएको हो ।
‘आयोगले अनुरोध गर्दागर्दै पनि केही व्यक्तिहरूले आचारसंहिताविपरीत वक्तव्य दिने, प्रेस विज्ञप्ति निकाल्ने, प्रकाशन तथा प्रसारण गर्ने र केही संचार माध्यमहरूले उम्मेदवारको जीत-हारको पूर्वानुमानका सामग्रीहरू प्रसार गर्ने तथा विभिन्न व्यक्तिहरूको अन्तर्वार्ता लिनेजस्ता गतिविधिहरू गरेको देखिएकाले यसतर्फ आयोगको गम्भीर रूपमा ध्यानाकर्षण भएको छ’, आयोगले जारी गरेको विज्ञप्तिमा भनिएको छ ।
बाग्मती प्रदेशमा ६ जेठमा हुने राष्ट्रियसभा उपनिर्वाचनका लागि ३ जेठ राती १२ बजेदेखि मौन अवधि सुरु भइसकेको छ । मौन अवधिमा उम्मेदवारको पक्षमा मत माग्नु निर्वाचन आचारसंहिताविपरीत हुन्छ ।
निर्वाचन आचारसंहिताविपरीतका कार्य गर्ने व्यक्ति वा संस्थालाई आयोगले कानुनबमोजिम कारबाही गर्न सक्ने कुरा प्रष्ट गर्दै यसरी आचारसंहिताविपरीत कार्य गर्नेको अभिलेख राख्ने विज्ञप्तिमा उल्लेख छ ।