सीईडीबी हाइड्रोपावरको आईपीओ बाँडफाँट, यसरी हेर्नुहोस् रिजल्ट
सीईडीबी हाइड्रोपावर डेभलपमेन्ट कम्पनीले सर्वसाधारणका लागि जारी गरेको आईपीओ बाँडफाँट गरेको छ । शेयरको बाँडफाँट शेयर निश्कासन तथा बिक्री प्रबन्धक सनराइज क्यापिटलले गरेको हो । अनलाइनमार्फत बाँडफाँट गरेको आईपीओमा २ लाख ३४ हजार १९५ जनाले १० कित्ता शेयर हात पारेका छन् ।
कम्पनीले कुल जारी पुँजी ८३ करोड ९४ लाख १० हजार रुपैयाँको ३० प्रतिशतले हुने २५ करोड १८ लाख २३ हजार रुपैयाँ बराबरको आईपीओ निश्कासन गरेको थियो । निश्कासन गरिएको कुल शेयरमध्ये २ प्रतिशत अर्थात् ५० हजार ३६५ कित्ता शेयर कर्मचारीहरूका लागि र ५ प्रतिशत अर्थात् १ लाख २५ हजार ९११ कित्ता शेयर सामूहिक लगानी कोषलाई छुट्याइएको थियो भने बाँकी २३ लाख ४१ हजार ९५४ कित्ता शेयर सर्वसाधारणका लागि जारी गरिएको थियो ।
आईपीओमा सर्वसाधारणका तर्फबाट १०.५२ गुणा बढी आवेदन परेको थियो । कुल आवेदनमध्ये १६ लाख ८५ हजार ६२७ जनाले २ करोड ४६ लाख ५७ हजार ३५ कित्ता शेयरका लागि दिएको आवेदनमात्र योग्य रहेको थियो भने १६ लाख ३७ हजार ६५९ कित्ता शेयरका लागि ४८ हजार ३२२ जनाले दिएका आवेदन रद्द भएको क्यापिटलले जनाएको छ ।
आईपीओ निश्कासनका लागि गराएको रेटिङमा केयर रेटिङ नेपालले कम्पनीलाई केयर एनपी डबल बी आईएस रेटिङ प्रदान गरेको थियो । यसले कम्पनीको दायित्व बहन गर्ने क्षमतामा औसत जोखिम रहेको जनाउँछ ।
आईपीओको रिजल्टको कम्पनीको वेबसाइट, बिक्री प्रबन्धकको वेबसाइट तथा आइपीओरिजल्टसिडीएससीडटकमडटएनपी मा क्लिक गरी हेर्न सकिन्छ ।
