भारतमा फैलिएको B.1.617 नामक नयाँ प्रजातिको कोरोना भाइरस अधिक संक्रामक रहेको र भ्याक्सिनलाई पनि बढी असर पुर्याउने खालको भएको भन्दै विश्व स्वास्थ्य संगठन (ड्ब्ल्युएचओ) ले विश्वस्तरमा चेतावनयुक्त संदेश जारी गरेको छ ।

ड्ब्ल्युएचओद्वारा जारी विज्ञप्तिमा भनिएको छ, 'हामी आधिकारिक रुपमा यसलाई विश्वस्तरमा चिन्तित बनाउने खालको भेरियन्ट घोषणा गर्दछौं' ।

गत डिसेम्बरको अन्त्यतिर भारतमा पहिलो पटक पत्ता लागेको उक्त प्रजातिको कोरोना भाइरसको एउटा सुरूवाती  रुप २०२० को अक्टोबर महिनामा नै पहिचान भएको थियो ।

हाल प्रतिदिन ४ लाखभन्दा बढी नयाँ संक्रमित थपिइरहेको भारतका लागि डब्ल्यूएचओले अक्सिजन, औषधि, स्वास्थ्यकर्मीका लागि सुरक्षाका सामग्री खरिद गर्नका लागि आवश्यक कोष जम्मा  गर्ने उद्देश्यले 'टुगेदर फर इन्डिया’ नामक अभियान सुरु गर्ने घोषणासमेत गरेको छ ।

यसअघि नै उक्त भारतीय प्रजातिको कोरोना भाइरस धेरै देशहरुमा फैलिसकेको र  यसको थप फैलावटलाई रोक्न धेरै मुलुकहरूले भारतसँगका हवाई उडानहरू रोकिसकेका छन् ।

चिकित्सक एवं स्वास्थ्य बिश्लेषकहरूले यो प्रजातिको भाइरसबाट हुने संक्रमण तथा मृत्युदर उच्च रहेको  बताउँछन् । साथै उक्त भाइरसबाट संक्रमित बिरामीहरुलाई अक्सिजनको अत्यधिक मात्रा आवश्यक पर्नेसमेत जनाइएको छ ।