महामारीको ताण्डव: एकै दिन १३९ जना कोरोना संक्रमितको मृत्यु
स्वास्थ्य तथा जनसंख्या मन्त्रालयका अनुसार पछिल्लो २४ घन्टामा कोरोना भाइरसको संक्रमणबाट देशभर एकैदिन १३९ जनाको मृत्यु भएको छ । नेपालमा कोरोना संक्रमण देखिएयता एक दिनमा मृत्यु भएको यो नै उच्च संख्या हो ।
गत २४ घन्टामा १७ हजार ६२३ जना पीसीआर परीक्षण र ७८८ जनाको एन्टिजेन परीक्षणबाट थप ९ हजार २७१ जना नयाँ संक्रमित थपिएका छन् ।
विगत सोही अवधिमा ४ हजार ७ जना संक्रमणमुक्त भएका छन् । सोमबारसम्म देशभर ९३ हजार १४१ जना जना सक्रिय संक्रमित रहेका छन् ।
संक्रमितमध्ये ६ हजार ७१५ जना संस्थागत आइसोलेसनमा र ५६ हजार ४२६ जना होम आइसोलेसनमा रहेका छन् । त्यस्तै हाल आईसीयूमा ९१० जना र २९५ जना भेन्टिलेटरमा उपचाररत छन् ।
त्यसैगरी उक्त समयावधिमा काठमाडौं उपत्यकामा ३ हजार ६०७ जना कोरोना संक्रमित थपिएका छन् । त्यसमा काठमाडौंका २ हजार ७७५, ललितपुरका ५०५ र भक्तपुरका ३२७ जना छन् ।
सक्रिय संक्रमितको संख्या झन्डै एक लाख पुग्न लागेको र एकै दिन त्यत्रो धेरै संक्रमितको ज्यान जानुले कोरोना महामारीले उग्ररूप लिन थालेको विज्ञहरू बताउँछन् । सरकारले यो महामारी नियन्त्रणका लागि अझ कडा एवं प्रभाबकारी कदम चाल्नुपर्ने उनिहरूको राय छ ।