प्रधानमन्त्री केपी शर्मा ओलीले प्रतिनिधिसभाको विषेश अधिवेशन बाट विश्वासको मत लिने प्रयोजनका लागि संसदमा मतदानको प्रक्रिया शुरु हुँदैछ ।
पहिलो बैठकको सुरुमा सभामुख अग्निप्रसाद सापकोटाले राष्ट्रपति कार्यालयबाट प्राप्त विशेष अधिवेशन आह्वानसम्बन्धी पत्र पढेर सुनाएका थिए । सभामुखले सो पत्र पढेर सुनाएपछि आफ्नो अनुपस्थितिमा बैठकको अध्यक्षता गर्ने सांसदहरूको नामावली वाचन गरेका थिए ।
त्यसपछि १५ मिनेटका लागि स्थगित गरिएएको संसदको दोस्रो बैठक पुनः सुचारु भएको छ । उक्त दोस्रो बैठकमा विश्वासको मतसम्बन्धी प्रस्ताव पेश हुनेछ ।
केहीबेरअघि बसेको नेकपा (एमाले) को माधवकुमार नेपाल-झलनाथ खनाल खेमाको स्थायी कमिटी बैठकले आफ्ना खेमाका सांसदहरू विश्वासको मत लिने प्रयोजनका लागि बोलाइएको प्रतिनिधिसभा बैठकमा अनुपस्थित रहने निर्णय गरेको छ ।
केहीबेर रोकिएर सुरू भएको बैठकमा विश्वासको मतसम्बन्धि प्रस्ताव पेस गर्न प्रधानमन्त्री केपी शर्मा ओली बोल्न सुरु गरेका छन् । विश्वासको मत लिने प्रस्ताव पेशगर्ने क्रममा बोल्दै ओलीले कोरोना खोपका विषयमा आफूमाथि हिलो छ्याप्ने काम भएको भन्दै असन्तुष्टि जनाएका छन् । उनले यदि कसैले भ्रष्टाचार गरेको भए अक्षम्य हुने र छानबिन गरेर कारबाही गर्ने बताए ।
ओलीले सरकारको ध्यान महामारी नियन्त्रणमा केन्द्रित रहेको बताए । प्रधानमन्त्री ओलीले कोभिड महामारीमा जनताको जीवन रक्षा पहिलो शर्त भएको उल्लेख गर्दै भ्याक्सिन अभाव भएपनि सरकारले दक्षिण एसियामा भारतपछि बढी खोप ल्याउन सफल भएको दावी गरे । उनले सरकारले पीसीआर टेष्ट, आईसीयू भेन्टिलेटरको समेत व्यवस्था गरेको जनाउँदै यस्तोमा पनि कसैले भ्रष्टाचार गर्छ भने यस्तो अपराध अक्षम्य हुने र छानविन गरेर कारबाही गरिने बताए ।
विश्वासको मतको प्रस्तावमाथि सांसदहरूले बोल्नेक्रममा प्रमुख प्रतिपक्षी नेपाली कांग्रेसका सभापति शेरबहादुर देउवाले कोरोना संक्रमणको यस्तो भयावह अवस्था आउनुमा सरकार जिम्मेवार भएको बताउदै
कमिसनका कारण खोप आउन नसकेको दाबी गरेका छन् । सरकार नै भ्रष्टाचारमा संलग्न भएको भन्दै देउवाले जनताको जीवन रक्षा गर्ने औषधिमा भ्रष्टाचार गर्नु जनतताविरुद्धको अक्ष्यम्य अपराध भएको बताए ।
पहिलो लहरमा स्वास्थ्य सामग्रीमा भ्रष्टाचार भएको र अहिले खोपमा भ्रष्टाचार भएको भन्दै उनले भने, ‘…व्यापारिक घरानाहरुलाई पोस्न तपाईंले नेपाली जनताको जीवन दाउमा लगाउनुभएको इतिहासले बिर्सन्छ'?
सभापति देउवाले 'जनताका लागि अक्सिजनको व्यवस्था गर्न नसक्ने, आक्सिजन बेड, आईसीयू, भेन्टिलेटर र अस्पतालको अभावमा जनतामा मरिरहँदा टुलुटुलु हेरिरहेका निरीह प्रधानमन्त्रीले भाषणमा आत्मरति र आत्मप्रशंसा गर्नु विडम्बनाबाहेक के हुनसक्छ?' भनेर प्रश्न गरे ।
त्यसैगरी विश्वासको मत लिने प्रस्तावको छलफलमा आफ्नो धारणा राख्दै नेकपा (माओवादी केन्द्र) का अध्यक्ष पुष्पकमल दाहाल प्रचण्डले प्रधानमन्त्री ओलीलाई 'यो सदन र यी सांसदसँग विश्वासको मत माग्ने तपाईंसँग नैतिक अधिकार छ'? भनेर प्रश्न गरेका छन् ।
दाहालले प्रधानमन्त्री ओली प्रतिनिधिसभा विघटन गर्ने मनसायका साथ विश्वासको मत लिएर आएका हुन् कि भन्ने आशंका पनि व्यक्त गरेका थिए ।
विगतमा प्रतिनिधिसभा विघटन गर्ने बुझेर माओवादीले समर्थन जारी राखेको दाहालको भनाइ थियो ।
अध्यक्ष दाहालले अहिले विश्वासको मत लिने कुरा स्वाभाविक एवं प्राकृतिक नलागेको र नाटकीय लागेकोे उल्लेख गर्दै नियमित अधिवेशन बोलाउनुपर्ने बेलामा विश्वासको मत माग्नका लागि अधिवेशन बोलाएकोले आशंका उब्जेको जनाएका थिए ।
उनले संविधानमा यसरी अधिवेशन बोलाउने व्यवस्था नरहेको जनाए । साथै प्रधानमन्त्रीले अपनाएको प्रक्रिया लोकतान्त्रिक र संविधानसम्मत नरहेको पनि उनको कथन थियो ।
त्य्स्तै जनता समाजवादी पार्टी (जसपा) का अध्यक्ष महन्थ ठाकुर प्रतिनिधिसभाको उक्त बैठकलाई सम्बोधन गर्दै आफ्नो माग पूरा नभएकाले तटस्थ बस्ने निर्णय लिएको र विश्वासको मतको पक्ष र विपक्ष कतैपनि नलाग्ने बताएका छन् ।
आफूहरू राजजनीतिक रुपमा पीडित रहेको जनाउदै अध्यक्ष ठाकुरले भने, 'हाम्रो सांसद जेलमा छन् । रेशम चौधरीलाई यहाँ देख्न चाहन्छौं । तर उहाँ जेलमा हुनुहुन्छ' ।
अहिलेको संविधानकै कारण आफ्ना नेताहरु जेल र तारिखमा बस्ने अवस्था रहेको सुनाउदै ठाकुरले यो गम्भीर त्रुटिहरू रह्र्को संविधान संशोधनको आफ्नो माग पूरा नभएको बताए ।
सोही सन्दर्भमा आफ्नो विचार व्यक्त गर्दै जसपाका अर्का अध्यक्ष उपेन्द्र यादवले प्रधानमन्त्री केपी शर्मा ओलीलाई विश्वासको मतको विपक्षमा मतदान गर्ने बताएका छन् ।
उनले प्रधानमन्त्रीले अस्ति गरेको संसद विघटनको कुरा उक्काउदै प्रधानमन्त्रीलाई प्रश्न गरे, ‘संसद असंवैधानिक तरिकाले विघटन गरिदिनुभयो । जनता सडकमा आए । सर्वोच्चले पुनर्स्थापित गरिदियो । जुन संसदमा विश्वास छैन, कसरी मत दिने' ।
यादवले पनि संविधानमा त्रुटि रहेको जिकिर गर्दै संघीय गणतन्त्रलाई नै प्रधानमन्त्री ओलीले धरापमा पार्न लागेकाले पनि समर्थन जनाउन नसकिने बताए ।
त्यसपछि सांसदहरूले उठाएका प्रश्नहरूको जवाफ दिदै प्रधानमन्त्री ओलीली संसद्को विश्वास आफूमाथि नरहेमा नयाँ सरकार गठनको लागि मार्ग प्रशस्त गर्नुपर्ने बताएका छन् । जवाफ दिने क्रममा प्रधानमन्त्री ओलीले भने, 'संसद्को विश्वास ममाथि छ भन्ने कुराको पुष्टि हुँदैन भने मैले मार्ग प्रशस्त गरिदिनुपर्छ' ।
विश्वासको मत लिने प्रयोजनका लागि बोलाइएको प्रतिनिधिसभाको विषेश बैठकमा ओलीले आगामी दिनमा संवाद, सहमति, एकताका साथ अगाडि बढ्नुपर्ने उल्लेख गर्दै आफू प्रक्रिया अपनाउन संसदमा आएको सुनाए ।
प्रधानमन्त्री ओलीले संविधानको कार्यान्वयन उचित ढंगले गर्न आफू दृढ रहेको ओलीको भनाइ राख्दै आफूले कुनै जालझेल र तिकडम नगर्ने ठोकुवा गरे ।
आफूलाई विश्वासको मत प्राप्त नहुने भन्ने पनि बुझेको बताउदै ओलीले थपे, 'अलिअलि परिस्थिति मैले पनि देख्या छु । कसको उपस्थिति छ, कसको छैन ? किन उपस्थित छ, किन छैन ? ती पनि बुझ्या छु' । साथै प्रधानमन्त्रीले प्रतिनिधिसभा फेरि विघटन हुने आशंका नलिन पनि ओलीले आग्रह गरेका छन् ।
प्रधानमन्त्रीले सांसदहरूका प्रश्नको जवाफ दिएसँगै विश्वासको मतसम्बन्धी प्रस्तावमा मतदानको प्रक्रिया सुरू भैसकेको छ ।
