भारतमा कोरोना संक्रमणको दर झन् बढिरहेको छ । त्यहाँ  विगत २४ घन्टामा ४ लाख  १४ हजार १ सय ८८ जनामा संक्रमण पुष्टि भएको भारतको स्वास्थ्य तथा परिवार कल्याण मन्त्रालयले जनाएको छ । त्यहाँ पछिल्लो २४ घण्टामा १८ लाख २६ हजार ४ सय ९० नमुना परीक्षण गर्दा उक्त संख्यामा संक्रमित भेटिएको थियो । भारतम गत शुक्रबार यता प्रत्येक दिन ४ लाख बढी संक्रमित थपिइरहेका छन् ।

त्यस्तै पछिल्लो समय भारतमा कोरोनाले मृत्यु हुनेको संख्या पनि उक्लिइरहेको छ । पछिल्लो २४ घण्टामा ३ हजार ९ सय १५ जनाको मृत्यु भएसँगै त्यहाँ कोरोनाका कारण ज्यान गुमाउनेको संख्या २ लाख ३४ हजार ८३ पुगेको छ ।

मन्त्रालयका अनुसार भारतमा हालसम्म २ करोड १४ लाख ९१ हजारभन्दा बढीलाई कोरोना संक्रमण पुष्टि भएको छ भने करिब १ करोड ७६ लाख संक्रमणमुक्त भएका छन् ।

भारतमा सक्रिय संक्रमितको संख्या ३६ लाख ४५ हजारभन्दा बढी छ भने त्यहाँ मंगलबारसम्ममा करिब १६ करोड ४९ लाख डोज खोप लगाइसकिएको छ ।

अमेरिकापछि भारत विश्वमा सबैभन्दा बढी संक्रमित मुलुकमध्ये दोस्रोमा स्थानमा रहेको छ ।