‘पियारी’को फिमेल भर्सन सार्वजनिक (भिडियोसहित)
पछिल्लो समय युट्युब, टिकटकदेखि सामाजिक संजालमा निकै रुचाइएको देउडा शैलीको गीत ‘पियारी’को फिमेल भर्सन सार्वजनिक भएको छ । लाइमलाइट नेपाल युट्टुब च्यानलबाट बिहिबार गीतको भिडियो सार्वजनिक गरिएको हो ।
नवगायिका विशाखा शाही ठकुरीको स्वरमा रेकर्ड भएको गीत हृदयस्पर्शी बनेको छ । जोसेफ शाही ठकुरीले स्वरमा रहेको ओरिजिनल गीतमा घरमा जहान सम्हालिरहेकी ‘पियारी’लाई परदेशमा दुःख गरिरहेको श्रीमानले सम्झाइरहेको भाव भेटिन्थ्यो । विशाखाको स्वरमा रहेको यो गीतमा भने पियारीले परदेशमा रहेका पियारालाई आफू कस्तो अवस्थामा जीवन गुजारीरहेकी छु भन्दै जबाफ दिएको भाव छ ।
जोसेफ शाहीको शब्दमा कोसिस क्षेत्रीको संगीत र उदयराज पौडेलको संगीत संयोजन छ । ए- वन म्युजिसियन स्टुडियोमा रेकर्ड गरिएको गीतको ध्वनि सम्पादन भने किशोर थापाले गरेका हुन् ।
फिमेल भर्सनमा स्वर मात्र होइन, गायिका विशाखाको अभिनय समेत हेर्न सकिन्छ । भिडियोमा विशाखासँगै पशुपति खनाल र अस्मिता सेन्चुरीको समेत अभिनय रहेको छ । राज पोखरेलको छायांकन रहेको भिडियोको सम्पादन र निर्देशनसमेत टेकेन्द्र शाहले गरेका हुन् ।
रियालिटी गायन प्रतिस्पर्धा ‘भ्वाइस अफ नेपाल सिजन- ३’ मा बाजुराका प्रतिभा धर्मेन्द्र सुनारले ‘पियारी’ गीत गाएर चारै जना निर्णायकको मन जित्न सफल भएपछि यस गीतलाई सर्वत्र रुचाइएको थियो । त्यसपछि ओरिजिनल गीतलाई पनि उत्तिकै रुचाइएको छ ।
हालसम्म युट्युवमा १८ लाखभन्दा बढी दर्शकले यस गीतको भिडियो हेरिसकेका छन् । पियारीको फिमेल भर्सनलाई लिएर पनि युटुयुबमा निकै उत्साहजनक टिप्पणीहरू आएका छन् । सार्वजनिक भएको १५ घण्टामा गीतको भिडियो २७ हजारभन्दा बढी दर्शकले हेरिसकेका छन् ।