पूर्वनिर्धारित सबै परीक्षा स्थगित, उपत्यकामा निषेधाज्ञा लगाउने तयारी
कोभिड-१९ संकट व्यवस्थापन संचालन केन्द्र (सीसीएमसी)को आइतबार बसेको बैठकले भौतिक उपस्थिति हुने पूर्वनिर्धारित सबै परीक्षा अर्को आदेश नभएसम्मका लागि स्थगित गर्ने निर्णय गरेको छ ।
भौतिक रूपमा उपस्थित नभई भर्चुअल र वैकल्पिक माध्यमबाट पठनपाठन भने जारी राख्ने निर्णय भएको सीसीएमसी सचिवालयका संयोजक डा. खगराज बरालले जारी गरेको विज्ञप्तिमा उल्लेख छ ।
कोरोना भाइरसको दोस्रो लहर भयावह बन्दै गएको र परीक्षाका नाममा भीडभाड भएको भन्दै सीसीएमसीले तत्कालका लागि सबै परीक्षा रोक्नुपर्ने निष्कर्ष निकालेको छ ।
संक्रमणको अवस्था हेरेर लकडाउनबारे निर्णय गर्ने अधिकार जिल्ला कोभिड- १९ संकट व्यवस्थापन केन्द्र (डीसीसीएमसी)लाई दिन बैठकले सिफारिस गरेको छ । पहाडमा २०० र शहरी क्षेत्रमा ५०० संक्रिय संक्रमित भएमा डीसीसीएमसीले निषेधाज्ञा गर्न सक्ने गरी सिफारिस गरिएको बताइएको छ ।
हवाई आवागमनबाट नेपाल आउनेहरूलाई १४ दिन अनिवार्य क्वारेन्टाइनमा राख्न पनि सिफारिस गरेको छ । ट्रान्जिट उडान रोक्न र स्थलमार्गबाट हुने आवागमनमा कडाइ गर्न पनि बैठकले सिफारिस गरेको छ ।
यसैबीच ५०० संक्रमित नाघेका उपत्यकाका ३ वटै जिल्लामा निषेधाज्ञा लगाउने तयारी भइरहेको स्रोतले जानकारी दिएको छ । यसका लागि सोमबार बैठक बस्दै छ ।