मन्त्रिपरिषद्को सोमबार बसेको बैठकले पास गरेको ‘नयाँ भेरियन्टसहितको कोरोना महामारी नियन्त्रण रोकथाम आदेश’मा सार्वजनिक कार्यालय र सार्वजनिक सवारीमा मास्क अनिवार्य गरिएको छ ।

आदेशमा उल्लेख भएअनुसार सार्वजनिक सवारीमा सिट क्षमता बराबर मात्र यात्रु राख्न पाइने र कुनै यात्रु मास्क नलगाई आएमा बढीमा १० रुपैयाँ लिएर सवारी चालक/सहचालकले मास्क उपलब्ध गराउनुपर्नेछ । मास्क नलगाउनेलाई भने सार्वजनिक सवारीमा चढ्न नदिने निर्णयमा उल्लेख छ ।

यससँगै सार्वजनिक कार्यालय, डिपार्टमेन्ट स्टोर तथा सपिङ मलहरूमा पनि मास्क अनिवार्य गरिएको छ । मास्क नलगाउनेलाई कार्यालय र पसलमा प्रवेश नदिइने उल्लेख गरिएको छ ।

यसअघि नै शहरी क्षेत्रका विद्यालय बन्द गर्ने निर्णय सरकारले गरिसकेको छ भने सार्वजनिक स्थानमा ५ जनाभन्दा बढी भेला हुन तथा विशेष कार्यमा २५ जनाभन्दा बढी उपस्थित नहुन भनिसकेको छ ।