अरुण भ्याली हाइड्रोपावर डेभलपमेन्ट कम्पनी लिमिटेडले आज ६ वैशाखदेखि हकप्रद शेयर निश्कासन तथा बिक्री खुला गरेको छ । कम्पनीले कुल चुक्ता पुँजीको  ५० प्रतिशत हकप्रद शेयर निश्कासन गर्न लागेको हो । कम्पनीले १०० रुपैयाँ अंकित दरका ५२ करोड ४१ लाख १९ हजार ७०० रुपैयाँ बराबरको ५२ लाख ४१ हजार १९७ कित्ता हकप्रद जारी गर्नेछ ।

९ चैत २०७७ सम्म कायम भएका कम्पनीका शेयरधनीहरूले मात्र उक्त हकप्रदमा आवेदन दिन सक्नेछन् । कम्पनीको हकप्रद शेयरको बिक्री प्रबन्धकमा मुक्तिनाथ क्यापिटल लिमिटेड रहेको छ ।

हकप्रद शेयर मुक्तिनाथ क्यापिटल, मुक्तिनाथ विकास बैंकका तोकिएका शाखा कार्यालयहरू, अरुण भ्याली हाइड्रोपावर डेभलपमेन्ट कम्पनी लिमिटेड ट्रेड टावर थापाथलीका साथै धितोपत्र बोर्डबाट आस्बा अनुमति प्राप्त बैंक तथा वित्तीय संस्था तथा मेरो शेयर सफ्टवेयरमार्फत आवेदन दिन सक्नेछन् । हकप्रदका लागि २६ वैशाख २०७८ सम्म आवेदन दिन सकिनेछ ।