नेकपा (एमाले) मुख्यालय थापाथलीबाट संचालन भएको छ । यही १ वैशाखदेखि पार्टी केन्द्रीय कार्यालय थापाथलीबाट पूर्ण रूपमा संचालन भइरहेको हो ।
कार्यालय अहिले सञ्चालन भए पनि ९ वैशाखमा नेपाल कम्युनिष्ट पार्टीको स्थापना दिवसमा प्रधानमन्त्री तथा पार्टी अध्यक्ष केपी शर्मा ओलीले उद्घाटन गर्ने कार्यक्रम रहेको कार्यालय सचिव ईश्वरी रिजालले जानकारी दिए ।
नयाँ पार्टी मुख्यालयमा अध्यक्ष, महासचिव, सङ्गठन विभाग, प्रचार विभाग र विदेश मामिला प्रमुखसहितका १२ वटा कोठा छन् । नयाँ कार्यालय सर्नुभन्दा अगाडि प्रधानमन्त्री ओलीले भवनको निरीक्षण गरेका थिए ।
२०७२ सालको भूकम्पले बल्खु, मदन नगरस्थित पार्टी मुख्यालय भत्किएपछि एमालेले धुम्बाराहीस्थित पासाङह्लामु स्मृति प्रतिष्ठानको कार्यालय भाडामा लिई मुख्यालय संचालन गरेको थियो । प्रतिष्ठानको भवनलाई मासिक २ लाख २५ हजार रुपैयाँ तिर्दै आएको थियो ।
पार्टीले धुम्बाराहीमा चक्रपथको सडक बिस्तारले आउजाउमा समस्या परेकाले थापाथलीमा कार्यालय सारेको हो । एमालेले मदन नगरमा पार्टीको अत्याधुनिक भवनको शिलान्यास पनि नेकपा स्थापना दिवसमा गर्ने भएको छ ।
पार्टी अध्यक्ष ओलीले भूकम्पपछि भत्किएको भवन रहेको जग्गामा नै नयाँ बन्ने भवनको शिलान्यास गर्नेछन् ।