कोरोनाको दोस्रो लहर सुरु भएसँगै विद्यालय बन्द गर्ने वा नगर्ने भन्ने अन्योलबीच सरकारले कोरोना भाइरस प्रभावित शहरी क्षेत्रका विद्यालय बन्द गर्ने निर्णय गरेको छ ।

सोमबार बिहान बालुवाटारमा बसेको मन्त्रिपरिषद् बैठकले विद्यालय बन्द गरी अनलाइन कक्षा संचालन गर्ने निर्णय गरेको हो ।

स्वास्थ्य तथा जनसंख्या मन्त्रालयले यसअघि नै काठमाडौँ, ललितपुर, कास्की, रूपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङलाई अतिप्रभावित जिल्लामा वर्गीकरण गरिसकेको छ ।

यी जिल्लासँगै शहरी क्षेत्रका विद्यालय बन्द गर्न सीसीएमसीले पटकपटक सरकारलाई सिफारिस गरिरहेको थियो । स्वास्थ्यमन्त्रीले विद्यार्थीलाई विद्यालय नजान अनुरोध गरिरहँदा शिक्षामन्त्री कृष्णगोपाल श्रेष्ठ भने 'कोरोनाले केही बिगार गर्न नसक्ने' भ्रम छरिरहेका थिए ।