सभामुखप्रति किन आक्रामक र आक्रोशित छन् प्रधानमन्त्री ओली ?
पछिल्लो समय प्रधानमन्त्री केपी शर्मा ओली र सभामुख अग्निप्रसाद सापकोटाबीचको द्वन्द्व सतहमा आएको छ । प्रधानमन्त्री र सभामुखको टकरावका कारण संसदले सहज ढंगले काम गर्न सकेको छैन भने सरकारले संसदलाई विजनेस नदिएर पंगु बनाउने खेल पनि चलिरहेको छ ।
विश्लेषकहरूका अनुसार यही टकरावका कारण प्रधानमन्त्रीले संसदलाई बेवास्ता गरिरहेका छन् । ओली संसद बैठकमा उपस्थित हुन रुचि गरिरहेका छैनन् । उनको अनुपस्थितिका कारण प्रतिनिधिसभाको अस्तित्वलाई ओलीले स्वीकार नगरेको टिप्पणी पनि हुन थालेको छ ।
त्यसो त सभामुखले पनि सदनका लागि प्रभावकारी भूमिका खेल्न नसकेको आलोचनासमेत भइरहको छ । संसदप्रति उत्तरदायी हुनुपर्ने सरकारका प्रमुखले नै संसदलाई बेवास्ता गरिरहँदा सरकार (प्रधानमन्त्री)लाई संसदप्रतिको जिम्मेवारीबोध गराउन नसकेको भन्दै सभामुखको आलोचना भएको हो ।
पछिल्लो समय प्रधानमन्त्री ओली सभामुख सापकोटाविरुद्ध निकै आक्रामक र आक्रोशित देखिएका छन् । ओलीले सार्वजनिक मंचबाटै सभामुख सापकोटालाई 'अराजक' र 'अनैतिक'को आरोपसमेत लगाउँदै आएका छन् ।
शनिबार बालुवाटारमा ओलीले बोलाएको सर्वदलीय बैठकमा सभामुखप्रति ओलीले दिएको अभिव्यक्तिले पनि प्रस्ट पार्छ कि प्रधानमन्त्रीका 'स्वार्थ' र 'नियत' पूरा गरिदिन सभामुख सापकोटा बाधक बनिरहेका छन् । एमसीसीलगायतका रोकिएका काम सभामुखकै कारण रोकिएका ओलीको आसय छ ।
यस कारण पनि ओली सभामुख सापकोटालाई हटाउने मनसायमा देखिएका र सोहीअनुसारका व्यवहार गरिरहेका राजनीतिक वृत्तमा चर्चा चलिरहेको छ ।
