पछिल्लो समय कोरोनाको दोस्रो चरण सुरु भएसँगै फैलिएको त्रासलाई न्यूनीकरण गर्ने र संक्रमण नियन्त्रणका उपाय अपनाउनेबारे सरकार र सम्वद्ध निकाय र विज्ञहरू केन्द्रित भएका छन् । सरकारले गठन गरेको कोभिड- १९ संकट व्यवस्थापन केन्द्र (सीसीएमसी)ले केही समयअघि नै ३ साता विद्यालय बन्द गर्न सिफारिस गरेको थियो । तर, निजी विद्यालय संचालकहरूको दबाबमा परेर सरकारले उक्त सिफारिस कार्यान्वयन गर्न सकेन ।

आज पनि सीएमसीले शहरी क्षेत्रका विद्यालयहरू वैशाख मसान्तसम्म बन्द गर्न सिफारिस गरेको छ ।

शनिबार दिउँसो सिंहदरबारमा बसेको बैठकले यस्तो सिफारिस गरेको हो । तर, सीसीएमसीले शहरी क्षेत्रबाहेक अन्य स्थानको हकमा भने प्रदेश र स्थानीय तहको निर्णयअनुसार हुने निर्णय गरेको छ ।

सीसीएमसीले गरेको सिफारिस मन्त्रिपरिषद्ले स्वीकृत गरेपछि कार्यान्वयन हुनेछ। पछिल्लो समय कोरोना भाइरसको सङ्क्रमण बढ्न थालेपनि स्वास्थ्य मन्त्रालले बारम्बार विद्यालय बन्द गर्न सरकारलाई अनुरोध गरेको भए पनि सरकारले उक्त अनुरोध सुनेको छैन ।