प्रधानमन्त्री केपी शर्मा ओलीले आज बोलाएको सर्वदलीय बैठक कोरोना कहरबारे छलफल गर्न भनिए पनि अन्तत: संसदमा विचाराधीन मिलेनियम च्यालेन्ज कर्पोरेसन (एमसीसी) सम्झौतालाई अघि बढाउने विषयमा केन्द्रित बन्यो । शनिबार बोलाएको सर्वदलीय बैठकमा नेकपा एमालेका अध्यक्षसमेत रहेका ओलीले एमसीसी सम्झौता पास गर्न आग्रह गरे पछि सर्वदलीय बैठकको 'नियत' प्रस्टिएको हो ।

उनले उक्त समझौता संसदबाट पास गर्ने प्रक्रिया रोकेको भन्दै सभामुखप्रति अराजक र अनैतिक भन्दै आक्रोश पनि पोखे ।

एमसीसी पास गर्ने कि नगर्ने भन्ने अधिकार संसदलाई भएको तर सभामुखले उनमा हुँदै नभएको तजबिजी अधिकार प्रयोग गरेर यसलाई रोक्न खोजेको बैठकमा उपस्थित दलका प्रतिनिधिको धारणा थियो ।

सभामुख र कार्यव्यस्थामा छलफल गरेर यो विषय टुंगोमा पुर्‍याउनुपर्छ भन्ने साझा धारणा आएको बैठकमा सहभागी एक नेताले जानकारी दिए ।

प्रमुख प्रतिपक्षी नेपाली कांग्रेसले पनि एमसीसीलाई अघि बढाउने आफूहरू सकारात्मक रहेको भन्दै कार्यव्यवस्था परामर्श समितिमा बिजनेस लिएर प्रस्तुत हुन प्रधानमन्त्रीलाई सुझाव दिएको छ ।