अमेरिकाको इन्डियानापोलिस शहरमा बिहीबार साँझ एक व्यक्तिले अन्धाधुन्ध चलाएको गोली लागेर कम्तीमा ८ जनाको मृत्यु भएको छ ।
अन्तर्राष्ट्रिय विमानस्थल नजिकैको फेडेक्सको कार्यालयमा भएको उक्त गोलीकाण्डमा अरू धेरै व्यक्ति घाइते भएको प्रहरीले जनाएको छ । प्रत्यक्षदर्शीहरूले एक व्यक्तिले स्वचालित बन्दुकबाट गोली चलाएको र धेरै राउन्ड फायर गरेको बताएका छन् । प्रहरीले गोली चलाउने व्यक्ति पनि मारिएको बताएको छ ।
एक प्रत्यक्षदर्शी जेरेमी मिलरले स्थानीय विस-टीभीलाई प्रतिक्रिया दिँदै एक व्यक्तिले स्वचालित राइफलबाट गोली चलाएको देखेको बताएका छन् ।
प्रहरी प्रवक्ता जेनी कुकले पत्रकारहरूसँग कुरा गर्दै प्रहरी तत्कालै घटनास्थलमा पुगेको र कारबाही थालेको बताएका छन् ।
प्रहरीले उक्त गोलीकाण्डमा धेरै व्यक्तिलाई गोली लागेको र घाइतेहरूलाई तत्कालै अस्पताल पुर्याइएको जनाएको छ ।
फेडेक्सका एक प्रवक्ताले कार्यालयमा गोली चलेको र आफूहरूले प्रहरीलाई मद्दत गरिरहेको जानकारी दिए ।
सामान ढुवानी गर्ने फेडेक्स कम्पनीको इन्डियानापोलिसमा मात्र ४ हजारभन्दा बढी मानिसले काम गर्छन् ।
गत महिना पनि दक्षिणी क्यालिफोर्नियामा भएको यस्तै आक्रमणमा १ बच्चासहित ४ व्यक्तिको गोली लागेर ज्यान गएको थियो । २२ मार्चमा पनि कोलोराडो राज्यको बाउल्डरमा गोली चल्दा १० जनाको मृत्यु भएको थियो ।
संयुक्त राज्य अमेरिकामा हरेक वर्ष गोली लागेर झण्डै ४० हजार व्यक्तिको मृत्यु हुने गरेको अध्ययनहरूले देखाएका छन् । यीमध्ये आधाभन्दा बढी गोली चलाएर आत्महत्या गरेका घटना छन् ।
संयुक्त राज्य अमेरिकामा बन्दुकको नियमन गर्नेबारेमा राजनीतिक तहमा निकै ठूलो बहस हुने गरेको छ तर बन्दुक राख्नेबारेमा कडा कानुनको अभावमा यसको गलत प्रयोग बढ्दो छ ।
राष्ट्रपति जो बाइडेनले यसै महिना ६ वटा कार्यकारी आदेशमा हस्ताक्षर गरेका छन् । उनको भनाइमा यी व्यवस्थाले अमेरिकामा बन्दुकसँग सम्बन्धित हिंसा कम हुनेछन् ।