कोरोनाको दोस्रो लहर सुरु भएसँगै बालबालिकामा संक्रमण बढी देखिएपछि विद्यालय ३ साता बन्द गर्ने सीसीएमसीको सिफारिस कार्यान्वयनमा सरकार पछि हट्यो । निजी विद्यालय संचालकको दबाबमा विद्यालय बन्द गर्नबाट पछि हटेको सरकारले लाचारीवश बरु विद्यार्थीलाई विद्यालय नजान भन्यो ।

यसबीच काठमाडौँ महानगरपालिकाले भने विद्यालय बन्द गर्ने तयारी गरेको छ । स्वास्थ्य तथा जनसंख्या मन्त्रालयले विद्यालय नजान अपिल गरेपछि महानगरले शिक्षा समितिको बैठक बोलाएको छ ।

विद्यालय बन्द गर्ने र खोल्ने अधिकार केन्द्र सरकारले स्थानीय तहलाई दिएको छ । सरकारले १४ जिल्लालाई कोरोना अतिप्रभावित जिल्ला घोषणा गरेको छ । ती जिल्लाका स्थानीय तहहरू पनि विद्यालय बन्द गर्नेबारे छलफलमा जुटेका बताइएको छ ।

स्वास्थ्य मन्त्रालयका अनुसार जम्मा संक्रमितको १५ प्रतिशत संक्रमित विद्यालय जाने उमेर समूहका छन् । जोखिम बढेपछि कतिपय अभिभावकले बालबालिका विद्यालय पठाउन छाडेका छन् ।