गण्डकी प्रदेशसभा अधिवेशन सरकारको सिफारिसमा प्रदेश प्रमुख अमिक शेरचनले अकस्मात अन्त्य गरिदिएपछि आक्रोशित बनेका नेपाली कांग्रेस, नेकपा माओवादी केन्द्रसहितका दलले विशेष अधिवेशन आह्वानको माग गरेका छन् ।

विशेष अधिवेशन आह्वानको माग गर्दै बिहीबार प्रदेश प्रमुख शेरचनलाई निवेदन दिने उनीहरूले निर्णय गरेका छन् । कांग्रेस, माओवादी केन्द्र र जनता समाजवादी पार्टीका नेताहरू विशेष अधिवेशन आह्वानको निर्णय गरी प्रदेश प्रमुखलाई भेट्न गएका बताइएको छ । 

प्रदेशसभा सचिवालयमा आजै दर्ता गरेको अविश्वासको प्रस्तावमाथि अब छलफल हुन नसक्ने हुँदा नेपालको संविधानको धारा १८३ को उपधाराबम्मोजिम विशेष अधिवेशन बोलाउन माग गरिएको प्रदेश प्रमुखलाई बुझाउन तयार पारिएको पत्रमा उल्लेख छ । 

नेपाली कांग्रेस, माओवादी केन्द्र र जसपाका गरी २८ जना प्रदेससभा सदस्यहरूले हस्ताक्षर गरी बिहीबार मुख्यमन्त्रीविरुद्ध प्रदेशसभा सचिवालयमा अविश्वासको प्रस्ताव दर्ता गराएका छन् । अविश्वासको प्रस्तावमा नयाँ मुख्यमन्त्रीमा कांग्रेस संसदीय दलका नेता कृष्णचन्द्र नेपाली पोख्रेललाई प्रस्ताव गरिएको छ ।

गण्डकीमा नयाँ सरकार गठन गर्न अर्थात् अविश्वास प्रस्ताव पास हुन वा विश्वासको मत लिन ३१ सांसद आवश्यक पर्छ ।