संसदीय सुनुवाइ समितिको आइतबारको बैठकमा गर्ने भनिएको सर्वोच्च अदालतको न्यायाधीश पदका लागि सिफारिस भएका न्यायाधीशहरूको संसदीय सुनुवाइ ३ वैशाख २०७८ मा गर्ने गरी स्थगित भएको छ । 

सिफारिस गरिएका न्यायाधीशहरू नहकुल सुवेदी र कुमार चुँडालका विरुद्ध उजुरी दिनेहरूसँगको छलफल गरी सुनुवाइ सारिएको जानकारी गराइएको छ । 

अस्ति २५ चैतमा न्यायाधीशमा सिफारिसहरूको सुनुवाइ गर्ने निर्णय भएको थियो । पछि आइतबार न्यायाधीशमा सिफारिसविरुद्ध उजुरी दिनेहरूसँग छलफल गर्ने र बुधबार सुनुवाइ गर्ने निर्णय भएको थियो ।

सुनुवाइ समितिले सर्वोच्च अदालतमा न्यायाधीश सिफारिस भएका नहकुल सुवेदीविरुद्ध योग्यतासम्बन्धी विवादलाई लिएर सर्वोच्चमा परेको एउटा मुद्दाको फैसला कुर्नका लागि पनि सुनुवाइ सरेको बताइएको छ । यसअघि उनको मुद्दाको फैसला न्यायाधीश तेजबहादुर केसीको इजलासले ३० चैतमा सुनाउने निर्णय सुनाएको थियो ।

सुवेदीविरुद्ध नेपालको संविधान, २०७२ को धारा १२९ को उपधारा (५) अनुसारको योग्यता नपुगेको लगायत ५ वटा उजुरीहरू परेका थिए ।