क्षेत्रीय शान्ति, सहयोग र सद्भावका लागि स्थापना भएको बहुक्षेत्रीय प्राविधिक तथा आर्थिक सहयोगको लागि बंगालको खाडीको प्रयास (विमस्टेक) को १७ औं परराष्ट्रमन्त्रीस्तरीय बैठक सकिएको छ । उक्त बैठकमा म्यान्मारको हिंसाको विषयै प्रवेश गरेन । 

गत १ फेब्रुअरीमा सेनाले सत्ता कब्जा गरेपछि चर्किएको जनप्रदर्शनका क्रममा सेनाको गोली प्रहारबाट ५०० बढी प्रदर्शनकारीको ज्यान गइसकेको छ ।

उक्त क्षेत्रीय संगठनको वर्तमान अध्यक्ष श्रीलंकाले आयोजना गरेको भर्चुअल बैठकमा सदस्य राष्ट्रहरु भारत, नेपाल, बंगलादेश, श्रीलंका, म्यान्मार, थाइल्याड र भुटान थिए । तर सबै मुलुकका परराष्ट्रमन्त्रीहरुले पूर्वनिर्धारित विमस्टेकको एजेन्डामाथि नै आफ्ना भनाइहरु राखेका थिए ।

मानव अधिकारको व्यापक उलंघन गर्दै सैनिक शासकले गरेको दमनको अन्तर्राष्ट्रिय स्तरमै कटु आलोचना भइरहेका बेला  एउटा सुसंगठित बहुराष्ट्रिय संस्थाको बैठकमा उक्त विषयले प्रवेशसम्म नपाउनुले यस्ता क्षेत्रीय संगठनहरूको औचित्यमाथि नै प्रश्न उठेको अन्तर्राष्ट्रिय सम्बन्ध एवं मानव अधिकारका विज्ञहरू बताउँछन् ।