भारतको सीतामढीमा ७ जना नेपाली किशोरीहरू फेला परेको सूचना पाएको प्रहरीले जनाएको छ ।

ती किशोरीहरू मंगलबार महोत्तरी जिल्लाको भंगहा नगरपालिकाबाट बेपत्ता भएका ७ जना किशोरीहरू हुन सक्ने भन्दै नेपाल प्रहरीको एउटा टोली त्यसतर्फ प्रस्थान गरेको छ । प्रहरीका अनुसार उनीहरू भारतको सीतामढीस्थित रेल्वे लाइन नजिकै फेला परेको सूचना प्राप्त भएको थियो ।

फेला परेका किशोरीहरू भंगाहा नगरपालिकाबाट हराएकै किशोरीहरू हुन् या होइनन् भन्ने यकिन भई नसकेको बताइएको छ ।

सँगै घाँस काट्न गएका भंगहा नगरपालिका- ७ धर्मपुरकी १८ वर्षीया अस्मिता पासवान, १८ वर्षकै नगिना पासवान, १५ वर्षीया रिया पासवान, १५ वर्षकै अर्चना पासवान, १३ वर्षीया ज्योती पासवान, १० वर्षीया रन्जना पासवान र अर्की १० वर्षकै सीमा पासवान सँगै बेपत्ता भएका थिए ।

उनीहरूलाई अहिले भारतीय प्रहरीको निगरानीमा राखिएको र उनीहरूलाई भारतसम्म पुर्‍याउन के प्रयोजनका लागि कसले समन्वय गर्‍यो भन्ने कुराको अनुसन्धान भइरहेको बताइएको छ ।