पुनरावलोकनको निवेदन लिएर सर्वोच्च जाँदै प्रचण्ड
नेकपा (माओवादी केन्द्र)का अध्यक्ष पुष्पकमल दाहालसहितका नेताहरू पुनरावलोकनको निवेदन लिएर सर्वोच्च अदालत जाने तयारी गरेका छन् ।
गत फागुन २३ गते न्यायाधीशहरू कुमार रेग्मी र बमकुमार श्रेष्ठको इजलासले नेकपा (एमाले) र नेकपा (माओवादी केन्द्र) ब्युँताउने गरी फैसला गरेको थियो । उक्त फैसलाको पुनरावलोकन गर्ने निस्सा पाउँ भन्ने निवेदन बोकेर कानुन व्यवसायीसमेत रहेका राष्ट्रियसभा सदस्य रामनारायण बिडारीसहितको टोली मंगलबार बिहान ११ बजे सर्वोच्च अदालत जाने बताइएको छ ।
उक्त दुई पार्टीबीच भएको एकीकरण अवैधानिक भएको भन्दै एकीकृत नेपाल कम्युनिस्ट पार्टी(नेकपा) लाई जरै देखि खारेज गरी पूर्ववत् एमाले र माओवादी केन्द्रलाई पुनर्स्थापित गरिदिएको उक्त फैसलामा चित्त नबुझाएकाले सर्वोच्च अदालतको विषेशाधिकारअन्तर्गत रहेको आफैंले फैसला गरेको मुद्दाको आफैंले पुनरावलोकन गर्न सक्ने अधिकारमार्फत उक्त फैसलाको पुनरावलोकन गराउने उद्देश्यले सर्वोच्च अदालत जान लागिएको हो ।
सर्वोच्च अदालतले पुनरावलोकन गर्ने निस्सा प्रदान गरेमा पुनरावलोकनको प्रक्रिया अगाडि बढ्ने छ ।
अस्ति बसेको माओवादी केन्द्रको स्थायी कमिटीको बैठकमा कानुन व्यवसायीसमेत रहेका सांसद रामनारायण बिडारी, मुक्ति प्रधानलगायतका कानुन व्यवसायीले सर्वोच्चको फैसलाउपर पुनरावलोकनमा जाने सुझाव दिएका थिए ।
