रेशम चौधरीको रिहाइलगायत मागमा वार्ता गर्ने टोलीको संयोजक गृहमन्त्री थापा
रेशम चौधरीको रिहाइलगायत थारू कल्याणकारी सभा, थरूहट–थारूवान संयुक्त आन्दोलन र केन्द्रीय आन्दोलन परिचालन समितिले राखेका विभिन्न १९ बुँदे माग सम्बोधन गर्नका लागि सरकारले गृहमन्त्री रामबहादुर थापाको संयोजकत्वमा ३ सदस्यीय वार्ता टोली गठन गरेको छ ।
सोमबार मन्त्रालयमा आयोजित विशेष पत्रकार सम्मेलनमा सरकारका प्रवक्ता तथा सञ्चार तथा सूचना प्रविधिमन्त्री पार्वत गुरुङले उक्त वार्ता टोलीले आजैदेखि काम सुरु गर्ने पनि बताए ।
उक्त टोलीका सदस्यहरूमा प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराई र पूर्वसांसद भगवती चौधरी रहेका छन् ।
केही दिनअघि गृहमन्त्री थापा माइतीघर मण्डला पुगेर सरकारले वार्तामार्फत नै थरूहट आन्दोलनकारीको माग पूरा गर्ने प्रतिबद्धता जनाएका थिए ।
प्रदेश विभाजनका क्रममा असन्तुष्ट थारू समुदायले ७ भदौ २०७२ मा गरेको आन्दोलनमा टीकापुरमा नेपाल प्रहरीका एसएसपी लक्ष्मण न्यौपानेसहित ९ जनाको मृत्यु भएको थियो । उक्त घटनाको योजनाकार भएको भन्दै कैलाली जिल्ला अदालतले चौधरीलाई जन्मकैदको सजाय सुनाएकामा दिपायलस्थित उच्च अदालतत्ले सुरु जिल्ला अदालतको उक्त फैसलालाई सदर गरिसकेको अवस्था छ ।