चीनले उपलब्ध गराएको सहायता सामग्री लिन नेपाल वायुसेवा निगम (नेपाल एयरलाइन्स)को वाइडबडी ३३० जहाज आइतबार साँझ चीन गएको छ । कोरोनालगायतका अत्यावश्यक स्वास्थ्य सामग्री लिन निगमको जहाज चीनको बेइजिङ क्यापिटल अन्तर्राष्ट्रिय विमानस्थल गएको निगमले जनाएको छ ।

पूर्वनिर्धारित तालिकाअनुसार उक्त जहाज बेइजिङबाट स्थानीय समयअनुसार अपराह्न साढे ४ बजे काठमाडौँका लागि प्रस्थान गर्नेछ । उक्त जहाज राती साढे ८ बजे त्रिभुवन अन्तर्राष्ट्रिय विमानस्थलमा अवतरण गर्नेछ ।

गत १ चैतको मन्त्रिपरिषद्को बैठकले मित्र राष्ट्र चीनले प्रदान गर्ने कोरोनाविरुद्धको खोप ‘भेरासेल’लगायत सहायता सामग्री स्वीकार गर्ने निर्णय गरेको थियो । उक्त निर्णयबमोजिम चीन सरकारले उपलब्ध गराउने ८ लाख मात्रा कोरोनाविरुद्धको खोपलगायत सहायता सामग्री लिन निगमको जहाज चीन गएको थियो ।

स्वास्थ्य तथा जनसङ्ख्या मन्त्रालयसँगको समन्वयका आधारमा नेपालीका लागि अत्यावश्यक एवं महत्त्वपूर्ण कोरोनासँग सम्बन्धित स्वास्थ्य सामग्री लिन निगमको वाइडबडी जहाज प्रयोग गरिने निगमको निर्णय भएको र सोहीअनुरूप आन्तरिक तयारी पूरा भएको निगमले उल्लेख गरेको छ ।