होलीले लियो २ जनाको ज्यान, १० जनाभन्दा बढी बेपत्ता, दर्जनभन्दा बढी हताहत भएको अनुमान
बाग्लुङको बडिगाड गाउँपालिका- १० दर्लिङ र प्युठान जिल्लाको सिमानामा लागेको होली मेलामा भएको झडपमा २ जनाको ज्यान गएको र केही व्यक्ति बेपत्ता भएको बताइएको छ ।
दर्लिङको बल्देधुरीमा २ युवा समूहबीच झडप हुँदा हताहती भएको वडा- ९ का अध्यक्ष कृष्णबहादुर खत्रीले बताए ।
गुल्मी, बाग्लुङ र प्युठानको सिमाना बल्देधुरीमा होली मनाउन गएका युवाबीच झडप हुँदा २ को मृत्यु भएको र केही युवा घाइते भएको हुन सक्ने खत्रीले बताए ।
मृत्यु हुनेमा ३६ वर्षका प्रकाश कुँवर र ३४ वर्षका दीपक दमाईं रहेका छन् । उनीहरूको शव बल्देधुरी भीरबाट ५०० मिटर तल खसेको अवस्थामा भेटिएको प्रहरी नायब उपरीक्षक इग्वाल हवारीले जानकारी दिए ।
घटनास्थल मानव बस्तीभन्दा केही टाढा रहेको र त्यहाँ प्रहरी तथा जनप्रतिनिधि पुग्न समय लागेकाले घटनाको विवरण आउन समय लागेको हो ।
आइतबार दिउँसो बडिगाड- १० बल्देधुरीमा ३ जिल्लाका करिब ६०० जना उपस्थित भएका थिए । स्थानीयवासीका अनुसार झडपपछि बाग्लुङकै निसीखोला गाउँपालिका- ७ र बडिगाड- १० का केही युवा बेपत्ता भएको आशङ्का गरिएको छ ।
घटनामा १० देखि १५ जनासम्म हताहती भएको हुन सक्ने स्थानीयवासीले बताएका छन् । घटनापछि प्रहरी घटनास्थलतर्फ जाँदै गरेको इलाका प्रहरी कार्यालय भीमगिठेले जनाएको छ । विस्तृत विवरण आउँन भने बाँकी छ ।