पुनर्स्थापित प्रतिनिधिसभाको अधिवेशन गत २३ फागुनदेखि चलिरहेको छ । अधिवेशनका लागि सरकारले विजनेस दिन नसक्दा अलमलमा परिरहेको र सांसदरूले आएर जोक गर्दै चिया-चमेना गरेर फर्किनमा नै सीमित भएको छ ।
यसबीच सरकारले प्रतिनिधिसभा अधिवेशन अन्त्यको तयारी गरिरहेको स्रोतले जानकारी दिएको छ । 'विधेयक अधिवेशन' भनेर बुझिने यस अधिवेशनमा कुनै पनि विधेयक पास हुन सकेका छैनन् ।
पहिला नै पास गरिनुपर्ने केही अत्यावश्यक विधेयकहरू त्यतिकै अड्किएर बसेका छन् । झन्डै ३ दर्जन विधेयक अड्किएर बसेका संसद स्रोतले जानकारी दिएको छ । कतिपय विधेयकहरू विषय समितिले पास गरिसकेका छन् भने कति छलफलका क्रममा छन् । तर, यी विधेयकका विषयमा कुनै चासो नदिई सरकार प्रतिनिधिसभा अधिवेशन अन्त्यको तयारीमा लागेपछि अब यी विधेयक पुन: अलमलमा पर्ने निश्चित भएको छ र
गत १७ पुसभित्र सुरु हुनुपर्ने यो अधिवेशन ५ पुसमै प्रधानमन्त्री केपी शर्मा ओलीको सिफारिसमा प्रतिनिधिसभा विघटन भएपछि हुन सकेको थिएन । सर्वोच्च अदालतले ११ फागुनमा संसद विघटनलाई बदर गरिदिएपछि पुनर्स्थापित प्रतिनिधिसभाको बैठक अहिले बसिरहेको छ ।
संवैधानिक प्रावधानअनुसार नै १५ जेठमा बजेट ल्याउनुपर्नेछ । 'वर्षे अधिवेशन; भनेर बुझिने उक्त अधिवेशनमा सरकारका नीति र कार्यक्रम प्रस्तुत गर्ने र बजेट पास गर्ने मुख्य काम हुन्छन् ।
प्रतिनिधिसभाको चालू अधिवेशन अन्त्य गर्नुपर्ने बाध्यता पनि सरकारलाई छ किनभने वैशाखमा पुन: वर्षे अधिवेशन गर्नु नै छ । तर, हिउँदे वा विधेयक अधिवेशनले गर्नुपर्ने कामहरू यस अधिवेशनमा नहुँदा धेरै कुराहरूमा असर पर्ने विज्ञहरू बताउँछन् ।
